Vawiin chawhma dar 11:00Am khan Siaha DC's Conference Hall-ah Mizoram Planning & Programme Implementation Department hnuaia din, Mizoram Entreprenuership Development & Monitoring Committee (MEDMOC) hma lakna Entreprenuership Development Scheme (EDS) chungchang inzirtirna leh Mizoram Kailawn 2019 kalpui mek chungchang inhrilhfiahna hun (outreach programme) hman a ni.

Vawiin programme hi Siaha Bawrhsap Pu Bhupesh Chaudhary,IAS in kaihruaiin, sawmbik kalkhawmte chawnglawmna thu a sawi a. Pu Bhupesh chuan Siaha district-ah  hian sumdawnna lama ngaituahna tha tak tak nei, mahse sum leh pai harsatna avanga che chhuak thei lo tam tak an awm ngei a rin awm a. chutiang mi te tana sawrkar in hetiang programme tha tak a duang chhuak hi kan vannei hle a ni. Nangmahni chauh dinchhuahna tur ni lo, midang tana eizawnna siamsak thei tur khawpa he programme hi hmang tangkai turin duhsakna ka hlan che u, a ti.

Vawiin hun hmanah hian Pi Esther L.Khiangte ,Mizoram Consultancy Group(MzCG) aiawh chuan Mizoram Kailawn chungchang leh Application thehluh dan te  Power point presentation hmangin zirtirna hun a hmang a. Master Trainer Pu Mark V.Vanlalrema'n Entrepreneurship Awareness & Dntrepreneurship Development Scheme chungchangah power point presentation hmangin zirtirna hun  ahmang a. EDS awmzia leh a hnuaia hma lakna tur hma chhawp hrang hrangte sawi fiahin, Mizoram hma sawnna tur kailawn pawimawh tak a nih thu a sawi a. Sumdawnna kawnga hlawhtling leh dingchang tura thil pawimawh hrang hrang te, EDS hnuaia a ngaihna hriate tana hamthatna hrang hrang awm thei tur te a sawi fiah bawk.

Mizoram Kailawn 2019 hi a tum thumna niin, sumdawnna kawng thar ruahmanna tha neite inelna tur a ni. Hetah hian hma lakna hlawk leh awmze nei tura ngaihte ruahmanna theh lutin, chu chu mi thiamte’n a tha tha thlang chhuakin, sawrkar chuan an bul tanna tur lawmman a siamsak dawn a ni. He mia tel duh leh ruahmanna theh lut ve duh tan www.mizoramkailawn.org-ah internet kal tlanga inziah luh theih a ni a. Ruahmanna hi July ni 17 atanga August ni 9, 2019 thleng theh luh theih niin, mi thiamte’n an thlit fim hnuah September ni 6-ah result puan a ni ang a. A tlingte hrual zuina bootcamp hi September ni 16 kar hian buatsaih a ni ang a. September ni 23 bawrah Entrepreneurship Summit neih tur niin, hetah hian lawmman pawh sem nghal a ni ang.

Vawiina outreach programme-ah hian Siaha district-a mahni remhriatna hmanga sumdawnna kalpui tawh leh bul tan chho mekte, college zirlaite leh line department official-te kal khawmin, thu sawi ngaihthlak bakah hian sawi hona leh zawhna leh chhanna hun hman a ni bawk.