2298/2022-2023
Aizawl 13th October 2022: Vawiin khan Art & Culture Department leh Central YMA tangkawpte buatsaih Ramngaih Hla Zaipawl Intihsiak chu a tiak ta a. Vanapa Hall-a kharna inkhawm buatsaihah Art & Culture Minister Pu R.Lalzirliana chu khuallian a ni.

Pu R Lalzirliana chuan Ram Ngaih Hla Zaipawl Intihsiak hlawhtling taka buatsaih a ni chu lawmawm a tih thu sawiin sawrkar hotute bakah Central YMA hruaitute leh a tel zawng zawng te hnenah lawmthu a sawi a. Rual u ten thahnemngai takin an rilru zawng zawng sengin pipu nun mawi a liam mai loh nan ramngaih hla tha tak tak an lo phuah a, zonunmawi hi ral mai lovin thangtharte hian chhawm nung zel se an duh angin an duhna te tipuitling zel turin he zaipawl intihsiak hi ruahman a lo ni ta a ni, a ti. Art & Culture Minister chuan zaipawl te thiam lam leh a mawina ringawt ni lovin,  zonunmawi - tlawmngaihna, huaisenna, aia upa te zahna, rinawmna te; kan pipu te nun hlui leh kan ram mawi tak chawi lar tura hla phuahtuten hla an lo phuah te hi thangthar ten an hriat chhawn chhoh zel theih nan leh a thiam an tam theih nan buatsaih a ni, a ti bawk.

Khuallian chuan Branch YMA zaipawl lo tel zawng zawng te inpuahchahna a ropui, a ti a. Mizo nunmawi tak a cheimawi zual a, YMA nih a tinuam zual a ni, a ti. “Mi thenkhatin kan hnam nunmawi chul dawnin, phurh hlan siamin, inbuatsaihin hre thin mahsela, kan thalaiten tun hun min thlenpui hi ka lawm hle a, Zoram nula leh tlangval te hian khuavel hi kan la chhing ngei dawn a ni” Art & Culture Minister Pu R.Lalzirliana chuan a ti.

Aizawl khawpui huamchhunga Branch YMA te tana buatsaih he zaipawl intihsiak hi  October 10, 2022 khan neih tan a ni a. Zaipawl Intihsiak atan hian hla panga - Ro min relsak ang che, Raltiang i kai ve ang, Khuavel i la chhing ngei ang, Pi pu chhuahtlang hlui leh Sangha vuak hla tih te chu thlan chhuah a ni a. Heng hla panga atang hian hla chuam pakhat an thlang a, hla dang an sak tur pakhat an pawt theuh bawk a ni. Aizawl khawpui huamchhung atangin YMA Branch 34 an tel a, zaipawl member belhkhawm 1337 niin top 5 ah - Ramhlun South, Durtlang, Ramthar North, Dawrpui, Bethlehem Vengthlang leh Bawngkawn te thlan chhuah an ni.

Ramngaih Hla Zaipawl Intihsiaka lawmman pakhatna dawngtu chu - Dawrpui Branch YMA Zaipawl an ni a, pahnihna Durtlang Branch YMA Zaipawl, pathumna Ramthar North Branch YMA Zaipawl te an ni. Lawmman palina atanga parukna hi Bawngkawn, Ramhlun South leh Bethlehem Vengthlang YMA Zaipawl ten an dawng thung. He intihsiaknaah hian lawmman pakhatna cheng nuai khat, pahnihna cheng sing sarih, pathumna cheng sing nga, palina leh pangana cheng sing hnih hlan an ni a. Intihsiaknaa tel zawng zawng ten cheng sing khat an dawng theuh bawk a ni. Best Conductor lawmman dawngtu chu Pu H.Lalmalsawma, Durtlang Branch YMA Zaipawl conductor a ni.

Vawiin programme ah hian Art & Culture Director Pu R.Hmingthanzuala chu Chairman a ni a. Central YMA General Secretary Prof Lalnuntluanga’n report a pe a ni.