Mizoram Sawrkar sawmna tihlawhtlinga Chapchar Kut 2020, Aizawl Sipal Lammuala ropui taka lawm rawn chhimtu India rama ASEAN (Association of Southeast Asian Nations) ram palaite chuan vawiin chawhnu khan Champhai an rawn thleng a.  District Bawrhsap Pu SL Naveen leh district official dang te’n Circuit House kawtah an lo hmuak a. Medical Screening-te tihsaka Self Reporting Form-te an ziahfel  hnuah inlawmna hun hmangin Chaw chhun  kilho  a ni.

ASEAN Palaite lawmna thusawiin, Champhai Bawrhsap Pu SL Naveen chuan India ram hmun kilkhawr ber pawl Mizoram leh Champhai District thlenga Ambassador rual te’n an tlawh chu lawmawm a tih thu leh an cham chhungin mamawh an neihte district thuneitute hnena thlen hrehlo turin a ngen a. Hun tha leh duhawm tak hmang turin duhsakna a hlan a ni. 

ASEAN HoM Chairman Pu Bouenneme Chouanghom, Laos Ambassador chuan Champhai District thuneitute lo dawnsawn leh chawimawi danah an lawm takzet thu a sawi bawk. 

ASEAN ram palaite leh an nupuite hi district administration hmingin Mizo thuam thilpek hlan an ni a, Palaite pawhin district administration hnenah ngaihhruina thilpek an hlan ve bawk a ni. ASEAN ram palai vawiin Champhai rawn  tlawhtute hi  ram 5 Ambassador-te an ni a, ASEAN HoM Chairman hna chelh mektu Pu Bouenneme Chouanghom, Laos; Pu Moe Kyaw Aung, Myanmar; Pu Ung Sean, Cambodia; Pu Sidharto Reza Suryodipuro, Indonesia; Pu Pham Sanh Chau, Vietnam leh an nupuite bakah Official dang rawn zuitute an ni a. 

Ram palai, Ambassador-te hian vawiin chawhnu vek khan Rih Dil tlawh turin Myanmar lam panin Champhai an chhuahsan leh a, Myanmar ramah zan khat riakin naktuk  hian Aizawl lam panin an rawn let leh dawn a, haw lamah Khawzawl tlawhin chaw chhun an ei thla dawn a ni.