March ni 8 hi International Women's Day 2020 a ni a. Kumin hian Pathianni a nih avangin Lawngtlaiah chuan vawiin khan DAY-NULM, One Stop Centre leh Mahila Shakti Kendra te tang ho huaihawtin DC Conference Hall-ah SDO (Sadar) Pu V. Lalruatliana, MCS hovin hman a ni.

He hunah hian One Stop Centre (Sakhi)-a District Centre Administrator Pi J. Lalremkimi'n hmeichhe harsatna tawkte enkawl lailawkna (One Stop Centre) leh hmeichhiate dikna chanvo (Women's Right) chungchang powerpoint presentation hmangin a zirtir a. Mahila Shakti Kendra (MSK)-a Women Welfare Officer Pi Jeneth Vanlaldingpuii'n Beti Bachao, Beti Padhao leh Women Scheme chungchang a zirtir a. Advocate Pi Shiela Laldinpuii Hnialum chuan hmeichhiate venhimna atana dan hrang hrang awm a sawi fiah a. DAY- NULM District Manager Pi Kerry V.L. Hmangaihzuali'n NULM hnuaia scheme hrang hrang te a sawi fiah bawk.

He hunah hian LWA General Headquarters, Lawngtai hruaitute leh branch tin atangin member pahnih theuh, MHIP Sub-Headquarters hruaitute leh branch tin atangin member pahnih zel, Lawngtlai khawpui chhunga anganwadi worker leh helper-te bakah, DAY-NULM hnuaia ALF member-te an tel a ni.