Vawiin March ni 7, 2020 (Inrinni) chawhnu dar hnih khan Health Minister Dr.R.Lalthangliana chuan COVID-19 (Corona Virus) laka Mizote kan fihlim theihna turin Lengpui Airport atanga khualzin lolutte endik hna kal mek chu, fimkhur zawk leh chak zawka hmalak anih theihna turin a hmunah a zu kal chilh a.

Lengpui Airport-ah hian Airport thuneitute chuan tun dinhmunah Airlines Flight 6 a awm mek a, khual zin lo tumte nitin mi 300 atanga mi 500 vel an dinhmun Health & Family Welfare-in an endik mek a, Airport-ah hian an khuasik leh sik loh enna khawl hmangin Doctor leh Nurse ten anlo endik thin tih Health Minister Dr R Lalthangliana chu an lo hrilh a ni.

Health Minister hian Airport chhunga Covid 19 chungchangah rinhlelh leh endik ngai bikte dah hranna tur a hranpa a siam Sample test leh collect-na tur siam mekte a enfiah nghal a, Civil Aviation hotute nen a tul anga hmala a siam nghal turin ruahmanna an siam nghal bawk a ni. 

Tun dinhmunah Lengpui Airport-ah hian Covid 19 endiktu tur Medical Duty 7 an awm a, Aviation lam duty 20 vel awmin , Health Minister chuan a tul angin thawktute dah belh an nih tur thu a sawi. Corona virus laka tuna Mizoramin a tih theih chu an thisen lo lak a, phai lama thawn a ni mai a,  Health Minister chuan a endikna khawl pawh Mizoramin a lei thuai tur thu a sawi bawk a ni. 

Health Minister hi Dr.F.Lallianhlira, Principal Director, H & FW, Dr.H.Lalchungnunga, Director, Health Sevices, Dr.Eric. Zomawia, MD,MHM, Dr.Pachuau Malsawma, Nodal Officer, IDSP leh midangten an tawiawm a. Principal Consultant, Civil Aviation, J.Lalhmingliana, Chief Airport Security Officer Zarzoliana, Dr.Elsa Lalramzauvi Pachuau leh thawktu dangten an lo dawngsawng a ni.

Attachment

  • Loading attachment...