Mizote kutpui ropui ber Chapchar Kut 2020 chu vawiin khan Lawngtlai Bawrhsap Pisa tualah hlung taka hman a ni a. Laifate zinga mi hming tha (prominent citizen), Lai Autonomous District Council (LADC)-a Executive Secretary hlui, ziak mi ni bawk Dr R. Tintlunga Hnialum chu Kut Pa niin, Lawngtlai Bawrhsap Pi Shashanka Ala, IAS chu Kut Thlengtu a ni.

Kut Pa, Dr R. Tintlunga Hnialum chuan Chapchar Kut chu hlimna kut a nih angin mipuite chu rilru inhawng tak chunga hlim taka kut turin a sawm a. Hmanlai hun atang tawhin khawvel hnam hrang hrangte'n kut chi hrang hrang an hmang thin a, Chapchar Kut pawh hi Mizote kutpui zinga chhawm nun zel niin, Kristian ram kan nih avangin ringtute chu chhang dawidim telh loh nen kan kut thin tur a ni, a ti a. Kumin Kut thupui "Zo nun ze mawi chawi san" tih chu aia upa zah thiam kawngah te, tlawmngaihnaah te, thu awihnaah te, 'sem sem dam dam, ei bil thi thi' tih theihna kawngah te a taka lan chhuahtir turin kal khawmte chu a sawm a ni.

Kut Thlengtu Lawngtlai Bawrhsap chuan Kut hmang tura kal khawm zawng zawngte Kut chibai bukin, duhsakna a hlan a. Chapchar Kut chu hlimna ni a nih ang ngeia hlim tak leh nuam taka hmang tura sawmin, hlimhlawp bawl satliah mai lo va, Kut thupui nunpuitu ni theuh turin a chah.

Grace Harmony, Lawngtlai Bazar te'n Mizo hnam hla, "Ro Min Relsak Ang Che" tih sain Kut an hawng a. He hla an sak lai hian mipuite'n dingin an lo tawiawm a ni. Mizoram Presbyterian Kohhran Lawngtlai Bialtu Pastor Rev. R. Lalfakawma'n hunserh a hmang a. MUP Sub Hqtrs Lawngtlai-in hlado leh bawhhla chhamin tlang an tlir a. MHIP Sub-Headquarters Lawngtlai, LWA Chandmary Branch leh YLA Council Veng Branch te'n hnam lam chi hrang hrang - parlam, chheihlam, khuallam, sarlamkai, pawhloh tlawh, chawnglaizawn leh cheraw te entirin, Don Bosco School Dance Crew te an lam bawk a. MHIP Sub Hqtrs Lawngtlai chuan hmanlai hun atanga hunbi indawt zela Mizote incheinain hma a sawn dan an entir a. Lawngtlai pawn lam atanga zaithiam lo kal - G'Nie, Josephine Lalawmpuii (Jojo) leh R. Lalsangzuali (Abawihi) te leh tualchhung zaithiam - Vanlalzawmpuii Hrahsel, Jennifer Lalruatkimi, Lalremliani, Lalawmpuii Hrahsel leh Mercy Remsangmuani te'n zai chi hrang hrang hmangin kal khawmte an awi bawk.

Organising Committee-in Chapchar Kut Miss, Little Miss leh Little Mister 2020 thlan chu Phawngpui Photographers' Association (PPA) kuta a dah angin, PPA chuan Kut hmannaa hnam thuama kal nula nalh zual an thlang chhuak a. Chapchar Kut Miss 2020-ah H. Lalduhsangi, Vengpui chu thlan a ni a; 1st Runner Up-ah Zodinpuii, AOC Veng leh 2nd Runner Up-ah Rampanmawii, Thingkah te thlan an ni. Hnam thuam inbel naupangte atangin Chapchar Kut Little Miss-ah Christy Lalhluzuali, Chandmary leh Little Mister-ah Peter Lalhruaizela, Chandmary te thlan an ni bawk. 

Vawiin Lawngtlaia Chapchar Kut hmannaah hian state leh LADC hnuaia official leh staff te, thu thar theh darhtute, tlawmngai pawl hrang hrang ai awhte, khawtlang hruaitute leh mipui thahnem tak an kal khawm a. Artui inbarha chhawng hnawtin, sawhchiar pir a, theitui in ho a ni a. Hlim taka zai leh lama hun hmangin, a huhova chheihin Kut hi khar a ni.

Lawngtlaia Chapchar Kut hlawhtling taka hman a nih theih nana tha leh zung sengtu zawng zawng chungah Kut Organising Committee chuan lawm thu a sawi a ni.