Khawzawl District Function hnua Chapchar Kut hmasa ber chu vawiin chawhma dar 11:00 atang khan Khawzawl Field No. 1, Zuchhip vengah hman a ni a. Chapchar Kut lawmnaah hian District Bawrhsap Pu H. Lianzela chu Kut Pa niin, Kut Puanzar a pawtpharh a. Khawzawl Group YMA President Pu K. Lalnunsanga chu Kut Thlengtu a ni.
Kut Pa Pu H. Lianzela chuan Chapchar Kut chu Khawzawl District mipuite tana malsawmna thlentu ni tura a duh thu sawiin, 'Chapchar Kut hi hlimna ni a ni a, kan pipute kha Chapchar Kut hman chhung hian an inhau ngai lo, inhauh awih a ni lo' a ti a. 'Nupa intih tlan leh midangte nena intih thinur a thiang lova, thenawm khawveng leh chhungkua theuh pawh inngeih takin an awm thin' a ti a. Chapchar Kut chuan hlimna, inpumkhatna, induhsak tawnna, inthianthatna leh inchawimawi tawnna thlen se duh thu sawiin, Khawzawl District mpuite chu hlim leh nuam ti taka Kut hmang theuh turin duhsakna a hlan a ni.
Vawiin Chapchar Kut pual hian Khawzawl khawpui chhunga YMA Branch 10 te leh Sawrkar Department hrang hrangin Zopa In 10 sa-in department hmalakna te an tarlan bakah, heng Inah te hian Mizo kut chhuak chi hrang hrang - Zupui, Zufang, Bal, Kawlbahra, Chhangban leh thildang te zawrh chhuah a ni a. Chapchar Kutah hian Khawzawl khawpui chhunga YMA Branch hrang hrang te bakah Biate, Ngaizawl, Neihdawn leh Chawngtlai atangte in hnam lam chi hrang hrang leh mizawn inchuhte entir a ni a, MUP in Hlado chhamin MHIP Sub-Headquarters in Siktuithiang lam an entir a ni. Pu H. Zoremsanga, President, Khawzawl District VC Association in lawmthu sawi a. Chai hmangin he hun hi khar a ni. Chapchar Kut pual hian Kut Pa, District Bawrhsap Pu H. Lianzela chuan a Quarter-ah zanriah a buatsaih a, Chapchar Kut Celebration Committee Member te leh sawm bikte'n zanriah hi an kilho a ni.
