Vawiin khan DC Conference Hall, Mamitah Pu Lalrinliana Fanai, Commissioner / Secretary, Health & Family Welfare Department leh Pi K. Vanlalrawni, Secretary, Social Welfare Department, Govt. of Mizoram hovin Aspirational District chungchanga an Department khawih thil ngaihtuaha thutkhawm a ni a. Meeting hi Pu Bhupesh Chaudhary, Mamit District Bawrhsapin a kaihruai.

Meeting-ah hian Health Department hnuaia Mamit District-in harsatna a tawh hrang hrangte thlirho a ni a. Health and Nutrition Indicators te hi a tlangpui thu chuan nu naupai inenkawlna (antenatal care), nu hriselna (anaemia), nau neihna hmun (institutional delivery), nau chhartu (skilled birth attendance), nau hnute pek, naupang hriselna (nutrition kaihhnawih), hritlang leh kawthalo enkawlna, hridanna, TB enkawlna, Sub Centre te tihchangtlunna (health & wellness Centre), Anganwadi te tihchangtlunna leh Indian Public Health Standards (IPHS) in a duan anga PHC leh District Hospital-a manpower dah a nih thu tarlan niin Extended Gram Swaraj Abhiyan hnuaiah Mission Indradhanush kalpui mek chu July 16, 2018 thleng portal a Update tawh a nih thu tarlan a ni a, Health & Wellness Centre kan District chhunga mite chu a rang lama thawmthat a, a nih dan tur anga kaltir a nih theih nan ruahmanna siam a ni a. Kan District chhunga LaQshya Scheme hnuaiah damdawi ina nauneihna Labour Room te chu a theih ang anga Doctor leh Staff inpawhkhawm a, Incentive te nena tihchangtlun tum a ni bawk. 

Health Department Action Plan, Planning Department hnuaia thehluh Rs 1,56,53,400 chu thlirho a ni a. POSHAN Abhiyan (Prime Minister Overarching Scheme for Holistic Nutrition) hnuaiah inbukna, studiometer leh infantometer te lei tum a ni a. Community Based Events (CBE) hnuaiah thla tin Suposhan Diwas (Father's Day) Anganwadi Centres-ah te hman thin nise tih a ni bawk. Heng bakah hian Village Health Sanitation Nutrition Day (VHSND) thla tin hman thin tura ruahman a ni a. VSHND-ah hian heng services-te hi pek thin an ni ang. 

1. Nu leh naute hriselna dinhmun enfiah (Ante Natal Check Up)

2. Hri danna pek (Immunization)

3. Nu naupai zirtirna pek (Counselling to pregnant mothers)

4. Naupang rih zawng buk (Weighing of Children)

5. Hriselna leh thianghlimna inzirtirna (Health & Hygiene)

Social Welfare Department hnuaiah Anganwadi Centres 600 tihchangtlun nan Sawrkar laipui atanga sum hmuh chu Mamit District bik tan 20% earmarked a nih thu tarlan a ni a. Pradhan Mantri Matru Vandana Yojana (PMMVY) hnuaiah Mamit District chhunga nu naupai hamthatna dawng 322 an awm tawh a. He Scheme hi tha taka kalpui a nih theih nan Aadhaar Card leh Bank Account thlun zawm a tul thu leh Internet Connection tha neih a tul avangin Department mawhphurtute chu hma la tura ngen an ni bawk.

Mahila Shakti Kendra hnuaiah thingtlang hmeichhiate hamthatna tur District Level Centre for Women (DLCW) din tawh niin Village Council Mamit te'n 'One Stop Centre' sak nan Hmar vengah ram an pek thu Meeting-ah hian tarlan a ni.

Vawiin Meeting-ah hian Principal Director, Health & Family Welfare, Director, Social Welfare Department, Department hrang hranga Aspirational District Nodal Officer bakah District Officials-te an tel a ni.