Vawiin khan Pi Lalbiaksangi District Bawrhsap kaihruaina in Mamit District-a Department hrang hrangte  leh Mizoram Science Technology & Innovation Council ( MISTIC) Officials te  chuan D.C Conference Hall, Mamit-ah Aspirational District – Mamit Consultative Meeting neih a ni.

Meeting kaihruaitu Pi Lalbiaksangi, District Bawrhsap chuan consultative meeting neih a nih chhan sawifiahin Mamit District chu India ram District hnufual thlanchhuah 115 ah telh kan nihna atanga khaichhuah kan nih theihna tura kan harsatna hrang hrangte zirchianga hma kan sawn theihna tura hmalakna  kalpui dan tur sawiho chu vawiin  meetingin a tum ber a nih thu a sawi a. Sawrkar laipui kaltlangin heng District hnufual tlanchhuah 115 te chawikan an nih theihnan ministry hrang hrang ten a theih ang angin tanpuina pek an in huam thu a sawi. Mamit District tan hian  National Health Mission Fund pawh 30% a tihpun a nih mai bakah Mamit  khawpui chu  AMRUT hnuaiah hmasawnna hna chak taka kalpui tum a nih thu a sawi bawk.

Vawiin meetingah hian Department hrang hrangte chuan Mamit District chhunga internet network connectivity that tawk loh avanga  an hnathawhna leh  hmalakna meka harsatna an tawh thu an tarlang a, tun laia hnathawh kalphung leh  payment kalphungah internet kaltlanga online vek anih avangin kan District chuan harsatna nasa tak a tawh thu tarlan a ni bawk.

District hnufual tehfung atana hman pakhat kawlphetha luh lohna Mamit District-a khaw 12  chu eng pek tuma hmalak mek a ni a, heng zinga khaw pali Damdiai, Kolalian, Bajirungpa leh New Eden te chu eng pek theih mai tura hna thawh zawh ni tawhin hun reilote ah a dang pariat 8 te pawh hi hmalak chhunzawm thuai tum a ni a, he mi tehfung bikah chuan kan District chuan hmasawnna lawmawm tak kan hmuh thuai tur thu tarlan a ni.  

Vawiin Meeting-ah hian  kan District harsatna te chu sutkian a nih theihnan  tunlai thiamna  Science & Technology hmangin MISTIC officials te chuan  theihtawpa hmalak pui an tum thu an sawi bawk.

Meeting-ah hian Sawrkar Department thlan bik hrang hrang te bakah Tlawmngai pawl YMA, MHIP, MUP te an tel a ni.