Vawiin chawhnu khan Sports and Youth Services (SYS) Minister Pu Zodintluanga chuan sawrkar laipui Ministry of Youth Affairs and Sports hnuaia Urban Sports Infrastructure Scheme (USIS) kaltlanga Rs. 600 lakhs senga sak Multipurpose Indoor Hall, Sazaikawn Lunglei a hawng.

Hawnna inkhawm Pu Lalthangpuia Sailo, Secretary, SYS kaihhruaiah hian Pu Zodintluanga chuan thu sawiin Lunglei District chhungah hun reilote chhungin infiamna lamah hmasawnna tam tak a thleng a, khawpui chhungah sports hmasawnna ruhrel ding thar hmuh tur tam tak a awm tiin sawrkar chuan hma a la chhunzawm zel dawn a ni,  a ti. Sazaikawn Multipurpose Indoor Hall chu Mizorama Indoor Sports Hall lian ber a nih thu leh sports discipline hrang hrang te tan hman theih a nih tur thu tarlangin Sports and Youth Services Minister chuan Lunglei thalaite he stadium hmang tangkaia National Level leh International Level inelna a tel thei tur khawpa taima taka an thiamna te tuaihriam turin a chah a. Sawrkarin mipuite hmakhaw ngaia hmasawnna ruhrel a siam te chu duat tak leh neitu rilru pu chunga enkawl turin kalkhawmte a ngen a ni.  Lunglei khawpui chhunga hmasawnna hna dang kal mek te pawh sawi langin Pu Zodintluanga chuan Housing for All Scheme hnuaiah chhungkaw tam tak inhmun nei insakna neilote tan a thlawna in sak sak turin chak taka hmalak mek a nih thu a tarlang bawk.

He huna khualzahawm Social Welfare Minister Pu PC Lalthanliana pawhin Sports and Youth Services Minister chak tak hmalakna zarah Lunglei khawpuiin sports infrastructure changtlung tak a nei chho mek zel chu lawmawm a tih thu he hunah hian a sawi a. Heng hmasawnna ruhrel hlutna tak tak paw chhuak tur chuan Lunglei mipuiten tangkai taka kan hman a tul a ni tih sawiin hlawhtling tura infiammi chherchhuahna hmanrua a Indoor Sports Hall chu hmang turin kalkhawmte a chah

He hunah hian Pu S. Laldingliana, Vice Chairman, Lunglei High Powered Committee, Pu Chalrosanga Ralte, Lunglei West Assembly Constituency MLA leh Pu Lalawmpuia, Chairman Lunglei District Sports Committee ten thusawina hun an hmang bawk. Pu Zothanmawia, Director, Sports and Youth Services in lawmthu sawiin hun a khar.

Sazaikawn Multipurpose Indoor Hall hawnna ah hian SAI Extension Centre, Lunglei zirlaiten Judo, Taekwondo leh Boxing demonstration hmuhnawm tak an nei a. Pu C. Laltlanthanga, Secretary, Mizoram State Sports Council chuan technical  report a pe a. Multipurpose Indoor Hall, Sazaikawn Lunglei sakna tur atan hian kum 2012-2013 khan Ministry of Youth Affairs and Sports hnuaia Urban Sports Infrastructure Scheme (USIS) atangin Rs. 600 lakhs hmuh a ni a. A hna thawk tur hian Lushai Engineers, Ramhlun South, Aizawl te chu thlan an ni a. Ni 26th Spetember, 2013 khan hnathawh tan niin Ni 30th August 2017 khan tha taka zawh fel a ni.

Multipurpose Indoor Hall hi chhawng hniha sak niin a zau zawng belh khawm hi 2484.86 Sq. Metres a ni. Building sak bakah hian Generator 50 KVA dah niin Parking leh Approach Road-te siam tel a ni a. Approach Road hi Rigid pavement (RCC) a siam niin a kawt zawl pawh motor parking na atan PCC a phah zawl vek a ni bawk.

Hawnna inkhawm ah hian Lunglei District sawrkar official te leh tlawmngai pawl hrang hrang aiawhte, MJA hruaitute leh mipui thahnem tak an kalkhawm a ni.

Attachment

  • Loading attachment...