Vawiin khan JNM School, Electric Veng, Lunglei ah National Deworming Day hman a ni.

He hun hi Pu VLMS Dawngliana, CMO, Lunglei in kaihruai in hriselna atan a rulhut hlo (Albendazole) ei a pawimawhna a sawi a, he ni hi India ram pumpui ah hman a nih thu a sawi a ni. Dr.Lalrinthangi, SMO, Lunglei in National Deworming Day lo awm chhan leh he programme in a tum tlangpui a sawi a, rulhut kan kai theih dan leh hriselna a tih chhiat theih dan a sawi bawk. Rulhut hlo (Albendazole) hi kum khat ah vawi hnih February leh August ah a thlawn a sem thin a nih thu sawi in, vawiin a ei lo te tan 13^th Feb 2018 ah pek an nih tur thu a sawi a ni.

Pu Ramthianghlima, DEO, Lunglei pawhin thu sawi in hetiang programme sawrkar in a buatsaih hi school naupang te tan vanneihna a ni a, Medical Department in a buaipui a, a hlawkna tel tu chu keini Education Department kan ni, a ti. Zirtirtute pawh in hriselna lam in zirtirna uar zel turin a chah bawk a ni. Rulhut hlo (Albendazole) hi school naupang leh he programme a kal ten a rual a ei na hun an nei a ni.