I&PR Director Pu David L. Thangliana, MIS chuan vawiin khan Lunglei Circuit House Conference Hall-ah Lunglei District Department hrang hrang hotute nen meeting pawimawh neiin District chhunga Sawrkar hmalakna hrang hrang mipuite hnena chak zawka puanzar a nih theih nan hmalak ho dan tur an sawi ho.

He meeting Pu Zathangliana, District Nodal Officer, NLUP kaihhruaiah hian Pu David L. Thangliana chuan Department hrang hrang hotu thahnem tak lo kalkhawmte chungah lawmthu a sawi a. Sawrkar hnathawk ten mipuite hmakhua ngaiin thahnemngai takin hna an thawk thin a, hun leh tha nasa tak sengin ram leh hnam hmasawnna kawngah hna an thawk thin a ni, a ti. Heng sawrkar hmalakna te hi mipuite hnena chak zawka pho lan a nih theih nan kalkhawmte chu thawhho puiah a sawm a,  Sawrkar leh mipui inkara inhriatthiam tawnna boruak tha a awm zel theih nan langtlang taka kan hmalakna hrang hrang te kan  pholan thin a tul a ni, a ti. Hemi kawnga I&PR Department hmalakna te sawi langin I&PR Director chuan TV Programme pahnih – ‘Mizoram Hmasawnna Lamtluang’ leh ‘I Sawrkar’ te chu kalpui mek niin heng programme te hi Department ten hmang tangkai turin a ngen a.  I&PR Department, Lunglei District leh I&PR Media Team te chu documentary video siam turin Department hrang hrang tan englai pawha an inhawn thu a tarlang bawk.

Vawiin meeting ah hian Health and Family Welfare Department, Agriculture, DRDA, UD&PA, PWD, Fisheries, Horticulture, Environment, Forest and Climate Change, Soil and Water Conservation, Sericulture, PHE, P&E, AH& Vety leh Industries Department hotute kalkhawmin an Department hnuaia hmasawnna hna hrang hrang an sawiho a, hemi kawnga hmalak chhunzawm zel dan tur an rel ho bawk.