Kar khat awh ‘Workshop on Entrepreneurship Development for Educated Unemployed Women, Research Scholars and PG students’, kharna hun vawiin khan AH&Vety Minister Pu C. Ngunlianchunga leh Cooperation Minister Pi Vanlalawmpuii Chawngthu ten State Guest House-ah an hmanpui. He workshop hi UGC leh Women’s Studies Centre and Incubation Centre Mizoram University tangkawpin an buatsaih a ni.

Khuallian AH & Vety Minister Pu C. Ngunlianchunga chuan entrepreneurship development chungchanga workshop tangkai tak buatsaih a ni chu lawmawm a tih thu a sawi a. NEDP hnuaiah entrepreneurship development ngaihpawimawh a nih thu sawiin tih takzeta hma laa dinchhuah tumte tanpui chu a tum bulpui ber pakhat a nih thu a sawi a. Minister chuan thawk lova hausak tum chu hmasawnna kawng daltu a nih thu sawiin thawhrimna leh teirei peihna tello chuan hlawhtlinna tak tak a awm theilo a ti a. Mizo thalaite an kalna kawng tur thlang fela, mahni kawng theuhah rinawm leh thahnemngai taka thawk turin Pu C.Ngunlianchunga chuan a chah bawk a ni.

He huna khualzahawm Cooperation Minister Pi Vanlalawmpuii Chawngthu pawhin thu sawiin Mizo hmeichhiaten nasa takin hma an sawn zel chu lawmawm a tih thu leh hma lam pan zel tura inzirtirna a pawimawh thu a sawi a. Cooperation Minister chuan mahni kutkawih ngeia dingchhuak turin inzirtirna neih nasat a tul thu sawiin mahni kutkawih ngeia dingchhuaka hmasawn duhte tan NEDP hnuaiah kawng a inhawng a ti bawk a ni.

Workshop kharna hun hi Prof Lalneihzovi Department of Public Administration leh Honorary Director, Women’s Studies Centre, MZU chuan a kaihruai a, MZU Registrar Pu C. Zothankhuma IDAS hnen atangin thusawi ngaihthlak niin workshop a tel te hnenah certificate hlanna hun hman nghal a ni. Workshop hian kar khat a awh a, mithiam hrang hrang te sawmin zirna leh sawihona hun neih a ni.