No.7647/2020-2021

Dr. Lalrozama, IAS, Mamit District Bawrhsap chuan Aspirational District hnuaia tehfung hrang hrang hmanga hnufual bik khaw 11 thlanchhuahte tlawh chhunzawm zelin vawiin khan Damdiai khua a tlawh a, khawtlang mipuite zirtirna leh inhrilhhriatna Public Meeting leh Awareness Campaign Programme hman a ni.

District Bawrhsap chuan Damdiai khaw mipuite hma-ah thusawiin India ram District chawikan ngai zingah Mamit District hi thlan kan ni a, Aspirational District kan nihna atanga khaichhuah kan nih theihna turin kawng hrang hranga hmalakna chuan hma a sawn rualin District Level atanga tehfung hrang hrang hmanga tehna atangin Damdiai khua hi chawikan ngai zinga chhiar tel a nih avanga tlawh a nih thu a sawi a. Damdiai khawtlangin hriselna kawnga hma an sawnna turin hmun leh hmuna harsatna sawikhawm chuan rah tha a chhuah ngei a beisei thu a sawi. Nu leh naute-in enkawlna tha an dawn theihna turin Nu naupai tan an pai atanga thla thum chhungin Sub- Centre-a in report ngei ngei chu kan tihtur a ni a, in report lo an awm a nih chuan khawtlang hruaitute kaltlang pawha hmala turin a hrilh a, in tin dapa in report lote vai chhuak turin an khawtlang hruaitute leh hriselna lama thawktute chu tangtlanga hmala turin a chah a ni. In lama nau nei an awm lohna turin leh Damdawiin ngeia nau neih a, enkawlna tha dawn a pawimawhna te inhrilhhriat thar a ni bawk. 

He hunah hian Health Department, Education Department, Lead District Manager/ Apex Bank, ICDS, WCD leh DLCW,( MSK )te'n  mipuite zirtirna hrang hrang an pe a, Health Department atangin nu leh naute-in enkawlna tha an dawn theihna tur leh hridanna lak kawnga hmasawnna tur hrang hrangte tarlan a ni a. Education Department lam pawhin Damdiai khawtlangin zirna kawnga hma an sawn theihna tur leh hmasawnna tur hrang hrang bakah Puitling ziak leh chhiar thiamlo mi 43 te zirtirtu mi 3 te'n zirtirna an kalpui mek chungchangah an hmalakna report ngaihthlak a ni bawk.

Lead District Manager/Apex Bank atangin Life Insurance leh pawisa khawl chungchangah zirtirna kalpui a ni a, Sawrkar laipui ruahmanna tha tak hnuaia Bank Account kaltlanga kum 18 atanga kum 70 inkar te tan zankhat mitchhin tawh palh thulhah Rs 12 leh Rs. 330/- senga Life insuarance kalpui theih dante bakah Kum 60 tlin hnu-a Pension lak theih dan leh pawisa khawl ngai zat hrang hrangte tarlan a ni a. Apex Bank thawktute chuan Damdiai khua Account hawng duhte tan hian an hawnsak nghal bawk a ni.

District Bawrhsap hian Sub-Centre leh Anganwadi tlawhin thawktute nen inkawmna neih nghal a ni bawk.

Vawiin Damdiai khua-a Programme for Upliftment of Low Performing Villages- hun hi Pu Biaksailova, VCP chuan kaihruaiin CMO, Deputy DPC, Manager Lead Bank, DPO (ICDS) aiawhte'n an tawiawm a ni.