No.7648/2020-2021

Samagra Shiksha, Champhai District leh Science Teachers Association Mizoram (STAM) tangkawp bultumin vawiin khan BRC Training Hall, Champhaiah ‘Science for Sustainable Living’ tih thupui  hmangin  District Level Children's Science Congress buatsaih a ni. He hun hi DEO & DPC Champhai Pu T.T Laltanpuia chuan hmanpuiin District Level Children's Science Congress a hawng a ni. 

Pu T.T Laltanpuia  chuan District Level Children's Science Congress inelna huanga telte chu District pumpui  aiawha feh chhuak tur an nih avangin tang sang sauh turin a fuih a. Science chu a thu mai nilo a taka lantir thin a nih avangin ngaihtuahna thui tak senga kalpui thin a nih thu a sawi a. Khawvela thil la awmlo hmuhchhuah leh kan thil neihsate engtinnge tangkai zawka kan hman theih ang tih ngaihtuaha chhui zel tura zirlaite chu chahin District Level Children's Science Congress 2020-2021 chu a hawng a ni. 

Hawnna hun hi Pu H.Darhmingliana, DDPC (S) chuan kaihruaiin, Pu Nelson Khiangte, District Academic Coordinator Champhai hnen atangin report ngaihthlak a ni a. District Level Children's Science Congress hi kum 1993 a tang khan chawl lovin kum tin neih thin a ni a, kumin hi a vawi 28 na a ni.  Covid-19  avangin nikum 2020 chhung khan neih theih a ni lo a,  kumin 2021 pawh hian hripui avangin tel duh School-te an tel vek thei  lova, Champhai District a tel tur leh District aiawha State level-a tel turin School 3 te thlanchhuah an ni. 

He hunah hian Champhai khawpui chhunga School 3;  Govt. Vengthlang Middle School, Presbyterian English School, Vengthlang  leh Bethel Mission School, Champhai  aiawh Children Scientist  te’n presentation an pe a ni. District aiawh thlante hian State Level Children's Science Congress, March Ni 3 leh 4, 2021 neih turah District ai an awh dawn a ni. 

District Level Children's Science Congress 2020-2021 hi vawiin chawhnu khan Pu D.P Rumliana, DDPC (E) kaihhruaina hnuaiah khar a ni a. He hunah hian endiktu tura ruat Govt. Champhai College-a thawk Pu Lijumon Lalremsanga, Asst. Prof.(Chemistry), Pu Kapchhunga, Asst. Prof. (Chemistry)  leh Dr. Zothansangi, Asst. Prof (Zoology) te’n  Zirlai Champhai ai awh turte hnenah Science chungchang  leh an presentation neih tura hma an sawn theihna tur thurawnte an pe a. Pu H.Lalhminglua, Addl. DPC Champhaiin  Zirlaite hnenah certificate a hlan bawk.