No.7646/2020-2021

Faina kawnga Champhai khawpuiin hma a sawn zel theihna tura pawimawh tak Champhai khawpui luhka Kanan veng tihfai hnatlang chu vawiin khan Kanan Sanitation Committee buatsaihin neih a ni. He hun hi Champhai District Bawrhsap Pi Maria C.T. Zuali leh Official dang te’n an telpui a ni. 

Bawrhsap Pi Maria C.T. Zuali chuan fai turin theihtawp chhuaha tanho angaih thu sawiin, vawikhat hnatlan mai nilo a taka nunpuia beih chhunzawm zel a tul dawn a ni, a ti a.  Operation Kanan tih hmanga VC kenkawh fai hnatlang neih chu nakin zelah pawh MHIP angte pawha chhunzawm nise a duhawm hle dawn thu a sawi a. Fai hnatlang neih chu midangte tihhmuhtu leh faina kawnga harhtharna leh tantlanna thlentu nise a duh thu a sawi bawk.

He hunah hian Pu Lalduhthlana DFO, Pu Lalhmunsanga DFDO, Pu Lalthansanga VCP Kanan, Pi H.Hluani  MHIP President, Kanan leh Pu Lalchhandama, Chairman, Kanan Sanitation Committee-te pawhin fai pawimawhna leh inzirtirna chungchang an sawi bawk a ni. Kanan veng hian fai kawngah nasa takin hma an sawna, UD&PA buatsaih fai  inelna  Swachh Survekshan 2020 neihah khan veng fai inelna huangah Champhai khawpui chhunga veng fai ber lawmman pahnihna an hauh a ni.

Vawiin fai hnatlangah hian veng chhung mi 100 dawn thuang hrang hranga insemdarhin an thawkchhuak theia, veng chhung lui kawra hnawmhnawk tlingkhawmte an thianfai a ni. Heng bawlhhlawhte hi an veng chhung mai bakah Kanan veng paltlang lui kawr hrang hrang hnara veng awmte atanga hnawm tlingkhawmte an ni hlawm a ni.

Kanan Sanitation Committee chuan lui kawrte a lo faia a lo thianghlim zawkna tur leh mihring hriselna leh leilet phaizawl tuitlan thlenga nghawng thalo a thlen lohna turin veng chhung leh thenawm venga cheng mipuite chu lui kawra hnawmhnawk chang theite paih lo turin a ngen a. Kanan veng chu UD&PA  hnawm halralna hmun panna kawng pui ber a nih avangin hnawm phur lirthei atanga hnawm tlate a awm thina, Kanan  veng kaltlanga hnawm paih thinte chu kawng laka hnawm thlauh a nih lohna tura fimkhur tur leh hnawm khat lutuk leh phuar that lohte phur lo hram turin an ngen nghal bawk a ni.

Vawiin fai hnatlangah hian Pi Maria C.T. Zuali DC, Pu Lalduhthlana DFO, Dr. Lallawmkima DIPRO, Pu Lalhmunsanga DFDO leh Kanan veng mipuite an tel a ni.