No.7645/2020-2021

Vawiin khan Lok Sabha Speaker Pu Om Birla hova mipui rorelna leh  Panchayati Raj  kalphung chungchang sawihona, State Convention Centre, Shillong-a neih ah panel of discussion-a tel, Mizoram MP(L.S) Pu C.Lalrosanga chuan District Council te leh tualchhung pawl hrang hrangte thuneihna sang zawk leh sum tam zawka thuam an tul thu a sawi a.  Hemi atana Lok Sabha Speaker hma lak dan chu lawmawm a tih thu a sawi.                           

Parliamentary Research and Training for Democracies buatsaiha he sawihona ah hian central minister, Lok Sabha MP te leh MLA, MDC, VC leh khawtlang hruaitute an tel a. Meghalaya Chief Minister Pu Conrad K Sangma leh Assembly Speaker te an tel a ni.

Pu Lalrosanga hian nimin khan Shillong a Food Corporation of India(FCI) Regional Office tlawhin FCI hotute nen Mizoram sawrkar laka Hill State Transport Subsidy la pek lohte pek theih dan tur an sawi hova. FCI General Manager Pu PN Singh leh Deputy General Manager Pu Sanjay Sharma te chuan Mizoram harsatna te chu sawrkar laipuia thlen turin MP chu thurawn an lo pe a. Mizoram chu hmarchhak biala FCI buhfai phur chhuak tha ber pawl a ni tih an sawi bawk.

Pu Lalrosanga hian nimin piah vek khan Assam Rifles DG, Lt.General Sukhdeep Sangwan pawh tlawhin Myanmar ramri leh Aizawl khawpui atanga AR insawnchhuah chungchang te a sawipui a. Aizawl atanga Assam Rifles sawn chhuah chungchangah Assam Rifles DG chuan hemi atan hian hma thar lak mek a ni a. Hna la zawh loh  leh enfel ngai thenkhat enfel mek a ni tih MP chu a lo hrilh a. Ramri hrula Assam Rifles hnathawh dan leh Myanmar atanga bungraw  tawlhluh ruk chungchang te an sawi dun a. Assam Rifles DG chuan danin a phut angin AR sipaite chuan ramri atanga Km 16 bial chhungah bungraw tawlhluh rukte an dap thin a, ralthuam pawh thahnem tak an man tawh a ni a ti a. Report engemaw bik a awm erawh chuan hmundangah pawh an dap tho thin tih sawiin Myanmar ramchhung buaina a awm leh tak hnuah ramri kana India ram chhunga lo lut ru an awm thu hriat a nih loh thu a sawi.

February ni 24 vek khan Pu Rosanga chuan khan Central Govt Health Scheme hmarchhak bial hotute kawmin Mizoram leh hmarchhak bial state danga CGHS  hnuaia private hospital hman theih, empanel dan turte an sawi ho va. Hmarchhak bialtu CGHS Addl. Director Dr.Bora leh senior Doctor te chuan central sawrkar hnuaia hnathawk mekte leh pension tawhte hriselna enkawlna kawng tha leh awlsam zawk siamna tura hmalak dan tur MP chu an lo sawipui a ni.