No.1562/2021-2022
Aizawl the 26th July, 2021 : Assam IGP kaihhruaina hnuaiah Cachar DC, Cachar SP, Cachar DFO leh Assam armed Police 200 rual vel zet chu vawiin July ni 26, chawhma dar 11:30 khan Vairengte Auto-Rickshaw stand ah an lo lut a. CRPF ten an ven lai duty post chu tihluihnaa rawn paltlangin Mizoram Police tam vak loin an ven mek pawh an kalpel a. Assam Police te hian Lailapur lam atanga Vairengte pana National Highway-a tlan motor engemawzah an tichhe bawk.
Assam Police ten buaina an siam tih hriat a nih veleh Vairengte khaw mipuite chuan thil awmzia hre chiang turin thil thlenna hmun an pan a. Ralthuam kenglo civil mi te hi Assam Police chuan tiang (lathi) nena beiin tear gas in an kap bawk a, civil mi engemawzatin hliam an tuar a ni.
Kolasib SP leh Executive Magistrate te pawh rang takin buaina thlenna hmun an thleng zui nghal a. Harsatna chinfel tuma an hmalakna chu Assam lam police leh official dangte hian pawisa loin dawhkan kilin engmah sawipui theih an ni lo.
Buaina hi a punlun zel a. Assam hian tear gas mai duh tawk lovin grenade hial an chelek zui ta a, Assam police hian tlai dar 4:50 bawr velah silai an hmet puak tan ta a ni.
Assam lamin silai an hmehpuah tak avangin civil mite chhan nan Mizoram Police pawhin silai an hmetpuak zui ve nghal a. Hetih lai hian Kolasib SP pawh CRPF duty camp-ah Assam Police hotute nen an in dawr mek a ni.
Assam police-in CRPF leh Mizoram Police duty te zahpahna nei loa paltlang luiin Mizoram chhung ngeiah Vairengte Auto-Rickshaw stand hial an rawn lut ta mai hian nunaute a tithlabarin, boruak nasa takin a tichhia a. He thil thleng hi a pawi tak zet a ni.
Union Home Minister chuan Assam leh Mizoram Chief Minister ve ve te a biak hnuah Assam Police te hi an tawlh kir ta chauh a, CRPF mi leh sa te hnenah an duty post pawh an hlan kir leh ta a ni.
Mizoram chhungah dan lova Assam Sawrkarin buaina a siam ta mai hi Mizoram Sawrkar chuan na takin a dem a. He buaina pumpelh theih a nih reng laia hetiang anga Assam lamin buaina nasa tak an rawn siam avanga hliam tuar an awm hi Mizoram Sawrkar chuan pawi a ti takzet a. Tun hnuah hetiang thil hi thleng tawh lo se a duh hle a ni.
Mizoram Sawrkar chuan Assam leh Mizoram inkar ramri buai hi muanawm takin, dawhkan kila chinfel thuai a nih a beisei a. Boruak tha tak hnuaia inbiakna a awm leh theih nan Mizoram Sawrkar chuan Assam Sawrkar pawh a tihtur tha taka ti turin a beisei a ni.
