Sorkar laipuia Ministry of Home Affairs bultumin Assam Rifles chuan Sipai Lammual ah May ni 1-9, 2017 chhung hian K. Kawla Under 19 Football Talent Hunt Tournament a buatsaih dawn a. He tournament-ah hian district tin atangin mipa leh hmeichhe team an tel dawn a; hemi atan hian vawiin khan a khuhhawnna Sipai Lammual ah vek neih a ni.

Vawiin tournament khuh hawnna hun buatsaihah hian Brig MS Mokha, DIG, 23 Sector, Assam Rifles chuan he hun hi hman puiin, Tournament lo pian chhuah dan a sawi a. Mizoram bakah Manipur, Nagaland leh Meghalaya-ahte hetiang tournament hi huaihawtin, chung atanga a tha ber berte chu India ram aiawha Asian Championship-a tel tir tum a nih thu a sawi a. Pu Lalnghinglova Hmar, MFA Honorary Secretary chuan thu a sawi bawk.

Tournament buatsaihnaah hian Assam Rifles chu Mizoram Football Association (MFA) nen thawk dunin, talent hunt hi chhawng thum a buatsaih tur a ni a. Thawh khatna hi state level a huaihawt niin, team chak berte chuan Mizoram aiawhin thawh hnihna Shillong, Meghalaya-a June thlaa neih turah an khel ang a; a thawh thumna chu Delhi-ah July thla khian buatsaih leh tura ruahman niin, team titha ber chuan Asian Championship-a India ram aiawh in an khel dawn a ni.

Mizote zinga India ram aiawha football khel hmasa ber K. Kawla hming chawia buatsaih tur Talent Hunt tournament ah hian mipa team 8 leh hmeichhe team 8 te chu Pool hnih ve ve ah then hran an ni a. Mipa Pool 'A' ah Serchhip, Siaha, Lunglei leh Kolasib te awmin Pool 'B' ah Mamit, Aizawl, Champhai leh Lawngtlai an awm a. Hmeichhia Pool 'A' ah Mamit, Lawngtlai, Aizawl leh Siaha awmin Pool 'B' ah Serchhip, Champhai, Lunglei leh Kolasib te an awm a ni.