Vawiin chawhnu khan Chief Minister Pu Lal Thanhawla hovin Chapchar Kut 2017 Organizing Committee chu CM Conference Hall ah Review meeting neiin an thukhawm a, kumin a Chapchar Kut hman dan chipchhiar takin an thlirlet. 

Chief Minister Pu Lal Thanhawla chuan thangthar leh thalai ten kan pipute Kut ropui ber Chapchar Kut an hlut chho zel hi a lawmawm a, nakuma kan tih tawh lo chi te, belh chi te leh kan kalphung te hi zalen leh zau taka sawiho turin ka sawm che u tiin thuhma a sawi a. Hmun hrang hranga awm Zo hnahthlak te pawhin Chapchar Kut an hmang thin chu thil chhenfakawm tak nia a hriat thu a sawi a. Thupui neia Chapchar Kut hman chu tha a tih thu a sawi bawk.  

Chapchar Kut Organizing Committee Secretary, CYMA General Secretary Pu Lalhmachhuana’n a Report ah Chapchar Kut 2017 inbuatsaihna te, Kut chhimtute, Chapchar Kut 2017 a hlawhtlin theih nana Sawrkar leh pawl hmalaknate, Chapchar Kut 2017 a thil chhinchhiah tlakte, Central YMA hnamlam entirte leh Chapchar Kut 2017 lawm nana sum ruahman chungchang te report ah tarlangin Sawrkar leh pawl hmalakna leh thawhhona chu a chhenfakawm thu leh hnam incheina leh Mizo inthuam inbel chu a hlawhtling hle nia a hriat thu te a sawi bawk a ni. 

Meeting ah hian khualzin hip nan Chapchar Kut ni hi a tuksa (fixed date) nise tih te, Thupui(Theme) neia Chapchar Kut hman chu tha an tih thu te leh kumina thupui ‘Aia Upa Zah’ chu Chapchar Kut nen pawh a inhmeh thu te,  Traffic Control tha zawk a awm thei nan Chapchar Kut Ni chu No Vehicle Zone atan puan a that thu te, programme duanna kawnga duhthawhna te, Tourism Department Festival neihte Chapchar Kuta chhunfina, Kut pakhat ropui deuha hman te, zunram thiarna hmunhma tihbelh a ngaih thu te, Mobile a Chapchar Kut chibai  SMS atanga thawnchhuah a that thu te chu sawi chhuah niin rawtna hrang hrang sawiho a ni a. Kumina Chapchar Kut hi kum dang zawng aia a chhimtu mipui an tam thu te, tum dang zawng aia a hlawhtling thu te. Mizo puantah handloom in ngaihsan a hlawh belh thu te leh Mizo inthuamna a inbel mipuiin an ngaihhlut thu te hi meeting ah hian sawilan niin heng thil hi thil lawmawm tak ram leh hnam hmasawnna anih dante sawilan a ni bawk. Meeting chuan March thla, Zirtawpni hmasa ber chu Chapchar Kut ni atan hman tawh nise tiin thutlukna a siam a, Tourism Festival dang Chapchar Kut nen chhunfin chu sawiho leh nise a ti bawk. 

Meeting ah hian Art & Culture Minister Pu R. Romawia bakah Organizing Committee Member-te an tel kim hle a ni.

Attachment

  • Loading attachment...