Salvation Army Eastern Territory kum za tlin lawmna hmanpui tura Mizorama cham mek General Andre Cox leh a nupui Commissioner Sylvia Cox te chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Raj Bhawan-ah a kawm. 

Mizoram Governor chuan Salvation Army-te hnathawh ropui a tih thu leh Mizoramah ngei pawh  hmalakna hrang hrang neiin mipuite tana an rawngbawlna a fak a. Mizote chuan khawtlang nun nghet tak, ziak leh chhiar ngah tak leh boruak, sik leh sa pawh duhthusam nei mahse nunphung tha lo sim tur an neih - zu, vaihlo leh ruihlo - te do tur leh siamtha tur chuan Salvation Army-te hnathawh a pawimawh hle a ni, a ti a. Sorkarin mipuite hmasawnna tura hmalakna a neihah kohhran leh tlawmngai pawlte nen thawhho zel a ngai a ni tiin Salvation Army hotute a hrilh. 

Salvation Army General Andre Cox chuan Mizoram sorkarin a lo mikhual leh enkawl danah an lawm hle tih a sawi a, mipuite rawngbawl tura din Salvation Army chu engtiklai pawhin mipuite tana sorkar hmalaknaah tanpui turin an inring reng a ni, a ti a. Khawvel ram changkang zawkte nen Mizorama mipuite nunphung tehkhin in General Cox chuan khawvel hmasawn chak lutuk chuan mihringte a tibuai hle a, engthawl leh hahdamna hun an nei mang tawh lova, chutiang karah Mizoramah chuan Pathianni tukah thildang zawng zawng chawlin Pathian biakna hun tha leh hahdamna hun mipuiten an nei thei hi tha leh entawntlak a tih thu a sawi. 

General Andre Cox te nupa hi Territorial Commander Commissioner Lalngaihawmi, Territorial Commander Designate Commissioner Lalzamlova leh a nupui Commissioner Nu-i leh ADC to General Captain Williamson ten an rawn tawiawm a ni.

Attachment

  • Loading attachment...