Vawiin khan Kawnpui Awithangpa Hall-ah Mizoram Assembly Deputy Speaker Er. Lalrinawma chuan MZP Sub Hqrs Kawnpui buatsaih Teachers Day  chu Khuallian niin a hmanpui a, Pi Lalhruaitluangi SDO(C) Kawnpui chu Khualzahawm a ni.

Khuallian chuan Zirtirtute chu mipui rilru thlak tura hmanraw nei tha tak an ni a; ram hmasawnna tluantling nei tura mipui rilru sukthlek thlak tura mi tangkai tak an ni, ram neitu rilru dik tak pu tura mipui cho chhuak tur pawhin Zirtirtu hi an tangkai bik hle a ni a ti. Khuallian chuan Zirtirtute fuihna thu sawiin ‘Zirtirtu zahawmna humhim hi midang tih tur a ni lo a; keimahni Zirtirtute ngeiin kan tih tur a ni a, he hna zahawm leh pawimawh tak hian mawhphurna tamtak a keng tel a chu mawhphurna chu rinawmna nen kan hlenchhuah a ngai ani’ a ti bawk.

He hunah hian Kawnpui Town chhunga Zirtirtu bakah School lama thawktu hrang hrang an tel a. Khawtlang hruaitu VC leh NGO ten an telpui bawk a. HIV / AIDS chungchanga hmalatuten zirtirna hun tawi an hmang bawk a ni.