Vawiin chawhnu khan Lunglei DIET Trainees’ Union buatsaihin DIET Multipurpose Hall-ah Teachers’ Day lawmna hun hman a ni a. He hunah hian Higher & Technical Education changtu Minister Dr R. Lalthangliana chu khuallian niin Aizawl West I MLA leh Vice Chairman, Manpower Development Committee Pu Zothantluanga chu khualzahawm a ni.

Minister Dr R. Lalthangliana chuan DIET Lunglei zirlai leh zirtirtu kalkhawmte Zirtirtute Ni chibai bukin DIET institute mamawh hmasawnna ruhrel changtlung zawk ruahman tura theihtawp chhuah pui a tum thu a sawi a. Kan rama zirna kan siam that dawn chuan zirtirtute training-na hmunpui DIET-ah bul kan tan a tul a ni tiin zirlaite chu thahnemngai taka thawk tur leh ram leh hnam hmasawnna tura hma la thin turin a chah. Khawvel changkang chho zelah kan ram economy te a changkangin a thang chho ve zel a, hei hian hna thar (job opportunity) tam tak a keng tel a, amaherawhchu thiamna tak tak neilo chuan heng hna te hi a hmuh theih loh a ni tiin trainees-te chu thiam tak tak tumna rilru nen tumruh taka inzir turin a chah a ni. Zirtirtu nih chu hna zahawm tak (noble profession) a ni tih hre thar leh tur leh an zirlai naupangte hmangaih leh dawhthei taka enkawl thin turin a chah bawk. DIET Lunglei chu Mizoram chhimlamah B.Ed training theihna awmchhun an ni chu chhuanawm a tih thu leh zirna ti hmasawn zel tura MZU Southern Campus pawh ti hlawhtling ngei tura hmalak zel a nih thu a sawi bawk.

A Department chan dang Health & Family Welfare leh Commerce & Industries hnuaia hmalaknate pawh sawilangin Health & Family Welfare Department hnuaiah hmasawnna ruhrel tih changtlun ‘Infrastructure Drive’ kalpui a nih tur thu a tarlang a. Hemi kawngah World Bank hotute a kawm thu leh hemi hmalakna kaltlang hian Mizoram chhunga Sub Centre, Primary Health Centre leh Hospital te equipment tha zawk an neih theih tur thu a tarlang. Tin, Commerce & Industries hnuaiah market hlui tawh leh thawm that ngai tawh tak tak te siam that leh sak that hna pawh kalpui anih tur thu a sawi a. Higher & Technical Education department pawh sawrkar laipui RUSA kaltlangin hmalak chhunzawm zel anih tur thu a sawi.

He huna khualzahawm Aizawl West I MLA leh Vice Chairman, Manpower Development Committee Pu Zothantluanga pawhin thu sawiin DIET zirlaite chu tumruh taka lehkha zir tur leh chhungkua, khawtlang leh ram tana chhawr tlak nih tum turin a chah a. Sawrkarin zirna  a ngaih pawimawh takzet thu leh amah ngei pawh Zirna ti hmasawn tura inrawnkhawmna leh zirhona New Delhi a neih New Education Policy Seminar-ah a tel ve thu kalkhawmte a hril a ni. Zirlaite chu chhawr tlak thiamna neih tum theuh tura chahin an kal zelna turah duhsakna a hlan a ni.

Minister hi KVI Chairman Pu Lalthanliana leh official dangten an rawn tawiawm a ni.

Vawiin vek khan Minister leh amah zuitute hian Lunglei KVI Office, KVI Emporium te tlawhin an mamawhte sawihona hun a hmanpui a. Hemi bakah hian John William Hospital (Mizoram Synod), Chanmari leh Christian Hospital Serkawn te tlawhin Medical Superintendent leh thawktute a kawm a. Ayushman Bharat Pradhan Mantri Jan Arogya Yojana (AB-PMJAY) leh Mizoram State Health Care Scheme (MSHCS) chu October ni 1, 2019-ah kalpui tan a nih tur thu leh heng Scheme-te hi mipuite tan hlawhtling taka kalpui anih theih nan hmalak puiah a sawm a ni.

AB-PMJAY hi sawrkar laipui Rural Development Ministry-in Socio Economic Caste Census (SECC) 2011 a buatsaiha khawsak harsa leh hnuaihnung a tih (deprived list-a tel) chhungkuate leh kum 2018-a Rashtriya Swasthya Bima Yojana (RSBY) hnuaia thla laa Smart Card neite'n an hmang thei dawn a, Golden Card siamin, chhungkaw khatin kum khatah Rs 5,00,000/- (nuainga) thleng damdawia inenkawlna senso an bill thei ang. MSHCS-ah thung hi chuan AB-PMJAY hmang thei lo - Below Poverty Line (BPL), Above Poverty Line (APL) leh sawrkar hna thawkte'n sawrkara an bill-sak theih loh chhungkaw member zawng zawng an inziak lut thei ang a, chhungkaw khatin kum khatah damdawia inenkawlna senso Rs 2,00,000/- (nuaihnih) thleng an bill thei thung dawn a ni.

AB-PMJAY hnuaia Golden Card hi sawrkar damdawi inahte siam lawk theih reng a ni a, damdawi ina in-admit dawn paw'n siam chawp theih a ni. SECC leh 2018-a RSBY Smart Card nei Golden Card siam tawhte chuan an Golden Card neih sa chu kum 2021 thleng an hmang zui thei bawk ang. MSHCS-a inziah luh nan chuan thla thum (September - October, 2019) chhung hun hawn a ni a, inziah luh man hi BPL chhungkaw tan Rs 100/- niin, APL chhungkaw tan Rs 1,000/- a ni thung.