Zirtirtute Ni pualin Dr Lalrozama District Bawrsap, Mamit chuan Mamit District chhunga zirtirtu zawng zawngte duhsakna hlanin vawiin khan DC Conference Hall-ah Mamit khawpui chhung zirna in hrang hranga thawktute nen inhmuhkhawmin thingpui inpuina hun a hmang.

District Bawrhsap chuan zirtirtute ni ah Mamit District chhunga Zirna In hrang hranga zirtirtute duhsakna hlanin khawtlang nun hrisel siamtu chu zirtirtute an ni a,  mihring hmantlak leh puitlinga chherchhuak tura zirtirtute hnathawh chu hna ropui tak niin chawimawi an phu hle a ni a ti. Zirtirna hna thawk mekte chu hmalam hun atana inpekna thuk zawk nena naupangte zirtir hna thawk sauh sauh turin a chah a ni.

Mamit District chu Aspirational District kan nihna-a tehfung pakhatah zirna lam thawktute zarah kumin May thla khan Education sector bikah India ram pumah a ti tha ber pawl kan ni a, hei hi chhawm nun zel a tul thu a sawi.

Bawrhsap chuan Zirtirtute chu ram leh khawtlang tana hna pawimawh tak thawk an nih vangin Sawrkar pawhin Zirtirtute Ni hman chu a ngai pawimawh hle a. Education Department kuta dah mai lovin Civil Administration lama hotute kaihruaina-in Sub-Division leh Block Level-ah te Committee dinin a hman dan tur rel thin a nih thu a sawi bawk.

Dr Lalrozama, District Bawrhsap hian zirna lama a tulna apianga hman turin Rs 10,000/-( singkhat) District Education Officer hnenah a hlan bawk a ni.

Pu Tlotha Nohro, SDC, Mamit chuan Mamit District chu Aspirational District Ranking siam nan hian Education Sector theme bikah hian za ah 30 a keng tel a, tehfung hrang hrang 8 awmin, chuta tang chuan data point 14 lai a awm bawk avangin zirna lama hmasawnna chu a pawimawh hle a ni tiin hemi chungchang hi a lem nen zirtirna a pe a ni.

Pi R. Lalnunthari District Education Officer, chuan District Bawrhsap-in Zirtirtute Ni ah zirna lama thawktute duhsakna hlana, an puala hun buatsaih a ni chu lawmawm a tih thu a sawi a. Zirtirtu kalkhawm zawng zawngte chungah lawmthu a sawi bawk a ni.

He hunah hian Mamit khawpui chhunga zirna in hrang hranga thawktute bakah zirtirna hna chawlhsan tawhtute atanga an hruaitute an tel a ni.