Mizoram Assembly Dy. Speaker Pu John Rotluangliana chuan nimin khan Bairabi-ah Art & Culture Department leh Bairabi Group YMA buatsaih Cultural Meet chu Bairabi khelmual-ah a hmanpui.

Dy. Speaker chuan, mahni hnam tih dan humhim tlat hi hnam puitling, hnam ropui zia a ni tiin, hetianga Bairabi khawtlangin hma an la chu lawmawm a ti a. Mizo hnam hi a thang chak em em a, chutih rualin kan kan hnam dan pela hnamdang tih dan kan lak loh a tha, kan ram leh hnam humhim turin Mizo bak kan awm lo, a ti.

Mizoten inhung bingna dan tha tak ILP kan neih chu humhim tlat a pawimawh thu sawiin culture vawnnun leh humhalh chu hnamdangte min chimral dodalna kawng tangkai tak a ni ngei ang, Pu John Rotluangliana chuan a ti bawk.

Art & Culture Department Dy. Director Pu R. Hmingthanzuala telpuina hunah hian YMA branch hrang hrangten Cheraw, Parlam, Khuallam, Chawnglaizawn, Siktuithiang, Upa Zai, Lengkhawm Zai leh Mizo Ladeh entirin nilengin hun hlimawm tak an hmang a ni.