Finance Minister Pu H Liansailova chuan vawiin khan Mizoram Finance & Accounts Service Association (MFASA) Annual General Conference vawi 33-na chu khuallian niin Tourist Lodge Chaltlang-ah a hmanpui.

Pu H Liansailova chuan Finance Department chu Sorkar Department pawimawh tak a ni tiin MFAS officer te chu Sorkar Department hrang hrangte sum enkawltu te an nih angin an hna chu tih takzeta rinawmna, thiamna leh hriatna nena thawh a tul thu leh midangte tan entawntlak nih a pawimawh zia thu a hrilh a. Sum khawihtu tan hmingchhiat leh fak a awl bik a, chuti chungin Finance officer te sawiselna hriattur a awm lo chu thil lawmawm a ni, a ti. Mipui leh sorkar hnathawk tam takin Finance Department chu sum khuahkhirh leh renchem lutuk thinah an ngaih chang awm mahse a takah erawh chuan Sorkar sum dik taka a hmanna tur taka hman a ni tih endiktu zawk, mawhphurna lian tak keng an ni a ti.  

General Conference hi an President Pu R. Lalbiakthanga’n a kaihruai a.  Vawiina an thurel langsar deuh deuh te chu Mizoram Sorkar hnuaia officer te sum khawih theih dan August ni 29 2011 a tihchhuah ennawn; Department hrang hrang leh Deputy Commissioner Office ah te DD (Accounts)/Finance & Accounts Officer hna siam rawtna; Accounts & Treasuries Directorate Chanmari atanga Secretariat hlui a sawn leh School Education, FCS&CA leh PHE Department ah te Joint Director (Accounts) dah rawtna te an ni.

MFASA member te chuan 2011 – 2012 chunga an pawl hruaitu tur tlanna an neih bakah an member thar lawmluhna leh an member boral ta sunna hun an hmang bawk a ni.