Mizo Students Union leh State Medicinal Plant Board tangkawpin Inter College Essay Competition an buatsaih result puanna leh lawmman sem inkhawm chu Health Minister Pu Lalrinliana Sailo chuan vawiin chawhma khan I &PR Auditiorium-ah a hmanpui.

Mihring hrisel nan sunhlu that leh tangkaizia chungchang Essay inziaksiak lawmman semna hi MSU General Hqtrs. President, L.Daniela’n a kaihruai a, Health Minister bakah Health Secretary Pi M Zohmingthangi leh Indian Society and Tobacco and Health Mizoram Chapter President Pi Lalriliani ten an hmanpui a ni. He Essay Competition-ah hian Mizoram College hrang hrang atangin mi 47 in an thuziak an thehluh zingah lawmman pakhatna cheng 10,000 leh Certificate chu Ramhmachhuani, RIPANS in a dawng a. Pahnihna  Lalnunmawia, Mizoram Law College chuan tangkaifai cheng 7000 leh Certificate dawngin lawmman pathumna cheng 5000 leh Certificate chu K.C. Lalthansanga, Govt. Aizawl College hnenah hlan  a ni. Mi panga te hnenah Consolation Prize cheng 1000 leh Certificate hlan an ni bawk.

He huna khuallian Health Minister chuan Mizo thawnthu lar tak pakhat, Mauruangi chanchin sawichhuakin ramhmul atanga damdawi tha mihring ten kan chhenfak theih dan a tarlang a. Ram leilung motherland duat leh enkawl pawimawhzia leh thangthar ten kan thing leh mau, nungcha tinreng humhalh kawnga hma an lak thin a fak thu a sawi a. Medicinal Plant humhalh leh tihpun zel nan hian sorkar laipui atanga tanpuina cheng nuai 53 hmuh turah nuai 25 zet dawn a nih tawh thu te, heng sum hmang tangkai hian Department hrang hrang te nen thawkhovin ramhmul damdawi humhalh leh venhim kawngah hmalak mek a nih thu te leh school compound-ah naupang te tlan theih tur sunhlu kung phun vek tum a nih dan te sawi a ni.

ISTH(M) President Pi Lalriliani pawhin zuk leh hmuam thatloh zia leh mihring te tana a pawithui thu bakah ramhmul damdawi tangkai zia zirlai kalkhawmte a hrilh a ni.