2464/2024-2025

Aizawl dated 10th October 2024: Vawiin chawhnu khan India hmarchhak state chawikanna leh thil siam chhuah lam a hma latute tih hmasawnna tur, 'Uttar Poorva Transformative Industrialization Scheme UNNATI 2024' zir hona hun chu Commerce & Industries Department bultumin Minister leh MLA-te tan buatsaih a ni a. He hun ah hian Pu Lalbiakzama, Speaker chuan kalkhawmte lawmna thu sawiin Dr. Lalzirmawia Chhangte, IAS, Secretary, Commerce & Industries Department chuan hun a kaihruai a ni.

Pu Lalbiakzama, Speaker, Mizoram State Legislative Assembly chuan Sawrkar laipuiin India hmarchhak state tih hmasawnna tur a UNNATI Scheme 2024 a duan, hmang tangkaitu nih tum theuh turin kalkhawmte a chah a. Mizoram hmasawn nana he scheme hmang tangkai tur hian Legislature-te chuan he scheme hi an zir a, an hmelhriat that a pawimawh thu a sawi. 

Dr. Karampaul Singh, Nodal Officer, North Eastern Region States, UNNATI Scheme leh Pu Lalhruaizela Fanai, Branch Manager, NEDFi (Scheme Nodal Agency) te chuan UNNATI 2024 thil tum leh hemi hnuai a hmalakna kalpui dan tur sawi fiahna hun an hmang a. Pu Mark Lalduhsaka, State Lead Project Manager, RAMP Project, Mizoram chuan MSME - RAMP chungchang sawi zauna hun a hmang. Zawhna leh chhanna hun te neih niin Pi Maria CT Zuali, Director, Commerce & Industries Department chuan lawmthu sawina hun a hmang bawk a ni.

UNNATI Scheme 2024 hi March ni 9, 2024 khan tlangzarh a ni a, March ni 8, 2034 thleng kalpui tur a ruahman a ni. He scheme kaltlang a hamthatna dil tum te tan UNNATI portal ah March ni 31, 2026 ral hma a inziahlut tur a ni a, he scheme kalpuina tur hian Sawrkar laipui chuan cheng vbc 10037 a ruahman a, Mizoram tan cheng Vbc 453 ruahman a nih thu tarlan a ni. UNNATI Scheme dil tur te chu DPIIT portal-a an inziahlut hnu ah Registration pek an nih atanga kum 4 ral hma in thil siam chhuah (Production/service) an nei ngei tur a ni a. Micro Industries zing ah hmalakna bultan nana cheng nuai 50 chin sengte tan hamthatna hi a dil theih a. Thil siam chhuah (Manufacturing) lam a hmalate tan, khawl leh a kaihhnawih (Plants & Machineries) inbun nana cheng Vbc 1 seng chin tan hamthatna a dil theih bawk a ni. Service sector zing ah hmalakna ruangam din nana cheng nuai 50 sengso te tan hamthatna a dil thei bawk. UNNATI Scheme hnuai a hamthatna dil theih service sector-te chu Tourism & Hospitality services, Promotion of Film Tourism, Ropeway, Entertainment Parks and Rides, Heritage Property restoration services- te a ni. Mizoram hi Zone B a dah a nih angin hamthatna, Capital Investment Incentives hnuai ah, Plants & Machineries a senso atanga za zela 50 dil thei a nih thu workshop-ah hian tarlan a ni.