2463/2024-2025

Kolasib Dated the 10th October, 2024 : Rilru hriselna chungchang inzirtirna ni - 'World Mental Health Day' chu vawiin khan khawvel pumah hman a ni a, Kolasibah pawh World Mental Health Day hi District Mental Health Programme leh State Institute of Rural Development-te buaisaihin SIRD Conference Hall, Kolasib Vengtharah 'Mental Health at Work' tih thupui hmangin hman a ni.

Kolasiba World Mental Health Day hmanna hi Pu ZR Thafala, Principal, Extension Training Centre, SIRD chuan a kaihruai a, Pi B. Malsawmtluangi, Addl. DC. Kolasib chuan he hunah hian khuallian niin World Mental Health Day Programme hi a hmanpui.

Khuallian chuan rilru hriselna 'Mental Health' pawimawhna tarlangin, chhungkua, Kohhran, Khawtlang leh hnathawhna hmun hrang hrangah Mental Health chungchang zirtirna chu uar zawka kalpui zel a tul thu a sawia. Sawrkar Department hrang hranga hnathawktute chu mipui in min mamawh avanga Sawrkarin a rawihte kan ni tih in hre reng chunga mipuite rawngbawla mahni hnathawhna hmun theuhah midangte tan malsawmna leh rilru hrisel thlentu ni thei turin a chah a. 'Mental Health at Work' tih thupui chu sawizauna neiin mitinte mahni hnathawhna hmun theuhah anmahni leh midangte tana rilru hrisel siam thei tur boruak tha siam turin a chah bawk.

Dr. RK Lalthlamuana, Senior Medical Officer, Kolasib District pawhin vawiina World Mental Health Day hmanna ah hian thusawina hun hmangin, Khawvel changkanna thang chho zelah mihringte nunphung a inthlak nasa in rilru hahna tur pawh a pun ve zel thu a sawia. Khawvel thiamna leh hmasawnna kawnga chak taka ke kan pen rual hian kan rilru hriselna kan ngaih pawimawh a tul takzet a ni, a ti. Kan hnathawhna hmunah Mental Health chungchang kan ngaih pawimawh loh chuan midangte nen ka thawhhona a chhe theiin kan hna pawh in hma a sawn loh phah thei tih hriaa Mental Health ngai pawimawh thar turin kalkhawmte a chah a ni.

Vawiin a Kolasiba World Mental Health Day hmanna ahhian Pi Lalngaihawmi Khenglawt, Psychiatric Social Worker, District Mental Health Programme, Health & Family Welfare Department, Kolasib chuan 'Importance of Mental Health at the Workplace, Struggles, Signs and Symptoms' tih thupui hmangin kalkhawmte hnenah zirtirna a pe a. He hunah hian Kolasib chhunga Department Office hrang hranga thawktute an kalkhawm a ni.