Vawiin khan Mizoram Legislative Assembly Session ni khat awh neih a ni a, The Mizoram Land Acguisition, Rehabilation & Settlement Bill, 2016 chu lungrual taka passed a ni.

The Mizoram (Land Acquisition, Rehabilitation and Resettlement) Bill, 2016 hi March 31, 2016 khan Assembly House ah Pu R.Romawia, Land Revenue & Settlement Department changtu Minister chuan ngaihtuah hona nei turin a pharh a, amaherawhchu, MLA ten uluk taka zirchian phawt nise tia rawtna an siam avangin a puluttu Minister hian Select Committee din a chipchiar zawk a zirchianna nei turin House-ah rawtna a siam a. Tichuan Select Committee din a ni ta a, Select Committee a Member te chu :

1. Pu R.Romawia - Chairman

2. Pu P.C. Zoram Sangliana - Member

3. Pu John Siamkunga - Member

4. Pu T.Sangkunga - Member

5. Dr. K.Beichhua - Member

6. Pu R.Vanlalvena - Member

7. Pu Lalruatkima - Member te an ni.

Select Committee hian Assembly Secretariat - a thawk tute nen he Bill hi uluk takin an zir a, meeting vawi ruk lai an neih hnuin Bill chhunga mi thu thenkhatte an siam rem hnuah vawiin khan House chuan lungrual takin an pawm ta a ni.

He Bill in a tum bulpui ber chu - Sawrkar-in mipuite hamthatna tur atana project lian tham a siam dawn emaw Central sawrkarin project liantham kan ram chhunga a kalpui dawn a mimal ram a lak dan tur chungchang leh chumi a ram laksak a te tana Compensation (zangnadawmna) a siam dan tur leh an awmna tur a buatsaih dan tur chungchang a ni.

He Bill hi Central sawrkar dan siam ‘The Right to Fair Compensation and Transparency in Land Acquisition, Rehabilitation and Resettlement Act, 2013’ zul zuia siam a ni a. He Central dan hi anih dan ang anga hman ve/adopt theih a nih rualin kan State anga hman tur Constitution of India Article 371G in phalna State thuneitute a pek angin Mizoram chhunga hman tur duan a lo ni ta a ni.