Vawiin chhun dar 12 khan DC Conference Hall-ah Serchhip District-a infiamna lama mi hmingtha, kum 2012-2016 chhunga State aiawha lawmman late hnena chawimawina Sports Incentive Cash Award sem a ni.

Inkhawm hi Pu Thankhuma, Dy.Director Sports & Youth Services in a kaihruaiaa, khuallian Pu HL Rochungnunga IAS chuan thu sawiin, Infiamna hi eizawnna tling ani tawh a, India chu FIFA Ranking ah 166-na vel a ni daih chungin Mizoram thalai 400 velin football pawh eizawn nan an hmang tawh a ni a ti a. Infiamnaah medal lak awlsamna lam ngaihhlut thiam a pawimawh thu sawiin, sorkar laipuiah pawh infiamna hmasawnna tur kawng hrang hrang duangin policy awmsa pawh her danglam mek a ni a, heng ruahmannna mila hma lak thiam a pawimawh a, Serchhip District atangin Sport Incentive cash award mi tam zawkin an lak theih nana thahnem ngai taka thawk turin infiammi leh inkhawma tel Serchhipa sorkar Department hrang hrang bakah Sports Association hotute a chah.

Vawiina Serchhip Districta Sport incentive cash award semnaa khualzahawm Bawrhsap Dr. Lalrozama, IAS pawhin thu sawiin, infiamna chu taksa mai bakah rilru leh thlarau lam hriselna atan pawh a tangkai a, zirna nena a kalkawp tul a tih thu leh infiamna lama mi hlawhtling, zirna lama pawl sang tak an nih chuan eizawnna nghet neihna kawng a inhawng zau bik a ni a ti a. Mizo hmeichhe infiammi zingah inti mipa an tam chu ngaimawhawm a tih thu a sawi bawk.

Vawiina Serchhip Dist a Sport incentive cash award pek tur hi mi 34 an nih laiin, mi 18 hnenah pek an ni a, midang 16 te chuan remchan zawkna avangin Aizawlah an lo dawng tawh a. Serchhip Dist a tana he cash award pek hi a vaiin Rs 2,73,750 niin chu’ng zinga a zat ve dawn lai Rs 1,35,000 chu Thenzawl a mi K.Lalngaihawmi, Taekwando Tournament tum 6-a medal la in a hui a ni.