Vawiin chawhnu dar 1:30 khan DC Meeting Room, Serchhip ah Serchhip Districta a tum khatna atan Civil Service day hman a ni.

District Bawrhsap Dr. Lalrozama, IAS chuan thu sawiin he ni hian a tum ber chu mipui tana rawngbawltuten ngaihtuahna changkang zawk nena intuaithar tlanna neih hi a ni a ti a, chumi atan chuan vawiin kalkhawmte, sawrkar Pisa hrang hranga hotu te, High School hrang hranga Headmasterte chu an pawimawh hle a ni a ti. Hmathlir thiam tul a tih thu sawiin, mahni enkawl department theuhah ngaihtuahna hmang thiam lehzual tura tan la turin kalkhawmte a fuih a. Langtlang taka awm ngam a tul thu sawiin, mipuiten an chan ai an chan theihnaah remchang zawnpui thiam a tul a ni a ti. Sawrkar mi chu tu Politics kaihbu mah ni lo tura awm turin leh chu chu kan nih dan tur pawh a ni a, mipuite an lalberna hi kan ngaihtuah hmasak ber tur a ni a ti a. Dan hnuaiah thutlukna mumal tak siam thei tura ngaihtuah fim hmang thin turin kalkhawmte a chah bawk a ni.

He hunah hian Pu R. Vanrengpuia, MCS, SDO (Sadar) Serchhip chuan “Good Governance” tih thupui hmanga zirtirna pein, Good Governance chu Rorelna tha tiin a sawi mai theih a, a a aia thui deuh zawka sawi chuan thuthlukna dik leh fel neih a, chu chu dik leh tha taka hlenchhuah tihna ani a ti a. Good Governance nihphung hrang hrangte sawifiahin, rorelna tha a awm theihna tura thil pawimawhte hi neih leh tih nghal vek a harsa ma thei a, mahni zawn theuhah, kan kova hna a awmdan ang zelin tih theih leh tih tur kan neihte a taka chatira tihlawhtlingtu tur kan ni a ti.

He hunah hian Serchhipa Sawrkar Department hrang hrang hotute leh High School hrang hranga Headmasterte an kal tha hle a ni.