Vawiin chawhma khan Champhai District ATMA Governing Board chu an Chairman DC Pu Vanlalngaihsaka, IAS kaihhruaina in DC Conference Hall, Keifangtlang-ah kum 2015-2016 chhung atan Extension Work Plan (2nd & 3rd Installment) leh kum 2016-2017 atan Strategic Extension Work Plan a chhawpchhuahte sawiho in an thukhawm.

Board Chairman Champhai DC chuan ATMA hmalakna hnuaia sum hman tur hi a tam lo hle chungin hnathawh tur engemawzat siam a nih chungchangah a thawktu te thahnemngaihna a tilang hlea a hriat thu leh, kuthnathawktute tana hlawkna kawng kawhhmuhna anih avangin Line Department-te pawh tangrual taka an thawh tlan pawimawh a tih thu a sawi a ni.

Board Member Secretary Pu R.K. Nithanga, ATMA Project Director leh DAO ni bawk chuan ATMA hnathawh dan tlangpui sawifiahin, ‘extension service’ anih angin kuthnathawktute zirtirna pek leh inhrilhriatna buatsaih chu an hnathawh pui ber a nih thu a tarlang a. Farmer-te tana Sorkar scheme siam hrang hrangte nen pawh inthlunzawm in, training pek ngaihnaah te ATMA hi ruat an nih fo thu a sawi bawk.

Vawiin meeting-ah hian an thurel tur chhawpchhuah chu a pahnih in pawm ve ve a ni a. Extension Work Plan hi Champhai District chhunga RD Block pali bakah KVK, Khawzawl leh ATMA Project Director Office, Champhai hmalakna tur te bithliah vek a ni a. Kuthnathawktute hi training turin leh exposure visit nei turin district chhung bakah state chhung hmun dang leh state pawn thlengin hruai an ni thin a. Kumin hmalakna turah hian farmer-te tana tangkai thei tur thlai leh ran enkawl dan inhrilhriatna leaflet siam tum a ni bawk. He scheme hnuaiah hian Sorkarin puihna hi a pum in tum lovin, 95% a tum ang a. Scheme kaihhruaina in a phut angin a bak 5% chu a beneficiary-te an tha thawh in an tum ve dawn a ni.