Vawiin khan Mizoram Science Centre, Berawtlanga Mini-Planetarium thar chu a duh apiang tlawh theih turin Science & Technology-a Chief Scientific Officer Dr. R.K. Lallianthanga’n a hawng.

Vanlam chanchin zirna Astronomy chu tunlai khawvelah Science zirna peng thang chak ber leh zir nasat ber pakhat a nih thu leh Astronomy zirna hian khawvel pianchhuah dan leh kal zel dan tur hriat chiannaah hmasawnna tam tak a thlen tawh a, a thlen mek zel bawk a ni tiin Dr. R.K. Lallianthanga chuan khawvel ram hausa leh thil ti theite hi Van sang chanchin zirna a sangte an ni zel a, Science thiamna a hmasawnna tak tak nei tur chuan vansang chanchin zirna Astronomy thiam tel a pawimawh a. Science leh Technology-a thang chak ram apiang chu ram changkang an ni a, ram ei leh bar a hmasawnna leh intodelhna tak tak pawh he thiamnaah hian a awm thu a sawi bawk.

Mini-Planetarium thar hawnna hun hi Mizoram Science Centre-a Scientific Officer Dr. Aldrin Malsawmtluanga’n kaihruaiin Mini-Planetarium hi Science Centre din tirh atanga zirlai leh mipui hlut ber anih thu a sawi a, a khawl lam chian loh vangin April 2012 atanga khan hman theih lovin a awm tawh a. Hotute hmalakna avanga hetianga a thar neih a ni leh ta hi a lawmawm em em a ni tiin Mini-Platerarium hi sawrkar laipuia Ministry of Culture hnuaia National Council of Science Museums atanga neih a nih thu a tarlang bawk.

Mini-Planetarium hawnna neih zawh hian a chhungah lutin Education Assistant Pu Lalrammawia’n a kalhmang leh nihphung sawiin, zanina Aizawl chunga arsi lan dan tur ngaihnawm takin a hrilhfiah ngal bawk a ni. Chief Scientific Officer hian Mizoram Science Centre-a Planetarium puitling tur leh Innovation Hub sak mek chu a hmunah kalin a enfiah nghal bawk a ni.