Mizoram Chief Secretary Pu Lalmalsawma hovin Administrative Training Institute (ATI) Auditorium-ah Civil Services Day vawi 10-na hman a ni.
Pu Lalmalsawma chuan Civil Services Day chu ram pumah hman niin a lawmna pui ber chu New Delhi-ah India Prime Minister Narendra Modi hova neih a ni, a ti a. He niah hian sawrkar hnathawk rual kalkhawmten rilru thar pua a ruaitu sawrkar tana theihtawp chhuah turin kalkhawmte a fuih a. Sawrkar hnathawkte chu sawrkar leh mimal inkar a intiamkamna 'contract' ziaktu an ni a, he contract ziaktute hian an tih tur an ti nge an tih loh tur an lo ti zawk tih leh an tih tur hlenchhuak turin theihtawp an chhuah em tih zawhna pahnih chu mahni mimal theuha chhang turin a sawm a ni.
Programme kaihruaitu Department of Personnel and Administrative Reforms (DP&AR) Principal Secretary Pi Renu Sharma pawhin thu sawiin he ni hi mahni inbihchian nana hmanga, sawrkar hna an zawm tirha phurna leh thil tha tih duhna rilru an put kha chhawm nung zel tur te, tumruhna leh taimakna nen mahni mawhphurhna hlenchhuak a, sawrkar, khawtlang leh thawhpuite mithmuha mi hlawhtling nih tum turin sawrkar officer rual kalkhawmte a fuih a ni.
Civil Services Day lawmna inkhawmah hian Mizoram sawrkara Joint Secretary leh a tlukpui chin chunglam an tel a. Planning Secretary Dr. C.Vanlalramsanga, Urban Development & Poverty Alleviation (UD&PA) Under Secretary Pu Lalmuansanga Ralte leh MZU Asst. Professor Dr. James LT Thanga te thuziak zirhona hun an hmang bawk.
