Integrated Disease Surveillance Programme buatsaihin vawiin khan I&PR Conference Hall-ah Health Department-a thawkte tan training neih a ni a. Hrileng thei chi hrang hrang leh invenna bakah inhrilhchhawn kawnga hriattur pawimawh te leh hrileng chhui dan chungchangah zirtirna pek a ni.

Vawiin training hi Dr C. Zirliana, CMO, Champhai chuan a kaihhruai a. Pi Lalnuntluangi, District Medical Superintendent chuan thu sawiin, hrilengin min tuam chang a awm a; hetiang hunah hian khaw tina Health Worker leh mipui hriselna atana thawktute chuan kan hmanrua leh bungraw neihsate chu a tangkai thei ang bera hrileng a darh zel lohna tura kan hmanthiam a tul hle a ni, a ti a. Hrileng chungchangah hian information kan lakkhawm that a, hrileng dona tura tangkai taka hman a nih theihna turin information report lamah pawh kan inthlahdah thiang lo a ni, a ti.

Hemi hnu hian Dr. Pachuau Lalmalsawma, Programme Officer, Integrated Disease Surveillance Programme (IDSP) chuan he scheme chungchang sawizauna a nei a. Ram changkangah chuan natna inkaichhawn theih loh deuh chauh an buaipui tawh laiin ram thangmek leh ram hnufualah chuan natna inkaichhawn theih, natna inkaichhawn theih loh leh natna thar buaipui a tul avangin hnathawh tur a tam hle tih tarlangin, hrileng do tur hian damlo vil ngun a, an dinhmun hriat chian te, laboratory-a natna hrik enfiah rante bakah information neihte tha tak leh chak taka report a tul a. Hemi hmang hian engtia hmalak tur nge tih chu awlsam zawkin a hriat theih a ni, a ti a ni.

Vawiin training-ah hian Portal Data Entry System chungchang te, Scrub Typhus leh Rove Beetle atanga natna kai theih chungchang te, Zika Virus leh pa (mushroom) ei tlak loh chungchangte bakah District-a Mobile Medical Unit-in IDSP an kalpui dan chungchangte zirho niin, zawhna leh chhanna hun an hmang bawk a ni.

IDSP hi Mizoramah kum 2005 khan Mizorama kalpui tan a ni a, he Programme hi Health Department hnuaiah Programme zawng zawngin ta anga an neih a ngai a, Health Worker chin in mawhphurhna thui tak an nei a ni. India ramah IDSP hian natna 12 a thlurbing a, Mizoramah chuan natna 4 thlurbing a ni ve thung a. Heng hrilengte hian mihring nunna tam tak a suat lohna tura thlithlaina chu IDSP in a thawh ber a ni.