Nihnih chhung thanga Jampui tlangdung Mizo khuate tlawha zuk kal Assembly Speaker Pu R. Romawia chu nimin khan dam takin Aizawl a lo thleng leh ta.

 

 

Tunhnaia Bungthuam khuaa tual thihna thlen denchhena Mizoram khawthlang khaw thenkhata thil duhawm lo chhuak leh hemi avanga Tripura state Jampui tlangdunga Mizo chhungkuate dinhmun ngaichang tura Mizoram Chief Minister duhdan anga zuk kal Assembly Speaker hian helai tlangdunga Mizo chenna khaw 7 - Zomuantlang, Phuldungsei, Sabual, Tlangsang, Bangla Zion, Behliangchhip leh Vanghmun te a tlawh a. Heng khaw mipuite hian Speaker hi lo hmuakin tunhnai buaina thleng avanga an thabar dan te, vauna leh tih thaihna hrang hrang an tawh dan te, Tripura sorkar thuneitu te, police leh Assam Rifles te chu an in hnemna ber a nih dan te an lo hrilh a. Tunhma lama buaina a chhuah tumah pawh Mizoram Chief Minister Pu Lal Thanhawla chungah an innghah tawh dante sawichhuakin tun tumah pawh hian Mizoram sorkar chu an inhnemna pui ber a nih thu an lo sawi a ni.

Khaw hrang hranga tlawhna ah hian thusawiin Assembly Speaker chuan beisei phak lova hetiang vanduaina lo thleng hi Mizoram sorkar chuan pawi a ti tak zet a, nunna chan leh tawrhna hrang hrang tawk tute tawrhpuiin buaina punlun zawka chhuah loh nan hma chak taka lak a ni, a ti a. Ramri in min dai dan mahse kan thinlungah erawh chuan min dai dan tur ramri a awm ve ngai lo va, chuvangin helai tlangdung mipuite harsatna leh manganna te chu a theih ang chin apiangah Mizoram sorkar chuan ngaihtuahpui a tum zel dawn a ni, a ti. Chi leh chi inkara inunauna boruak vawng nung reng tur leh buaina chhuak palh thei laka fimkhur reng turin mipuite chu a sawm a ni.

Tunhnai thil theng avang khan Tripura Jampui tlangdungah hian buaina chhuak sawi tur a awm lova, boruak a ralmuangin thil duhawm lo thleng a awm lo.