Vawiin ah khan Mizoram Legislative Assembly Subject Committee – III chuan Aizawl Civil Hospital leh Tertiary Cancer Care Centre, Zemabawk chhunga Health Department in hmalakna a kalpui mek te a hmunah tlawhin an endik.

Health Department hmalakna endiktu, Subject Committee - III rawn thawk chhuak te hi an Chairman Pu Lalrobiaka, MLA; Pu J.H. Rothuama, MLA; Pu John Siamkunga, MLA; Dr. K. Beichhua, MLA leh Er.Lalrinawma te an ni a. MLA rual hi Dr. Lalbiakima, Director, H&ME leh Dr. Lalhmangaihi, Joint Director ten tawiawm in Aizawl Civil Hospital ah hian Medical Superintendant Dr. Rosangluaia leh a thawhpui ten an lo dawngsawng a. Tertiary Cancer Care Centre (TCCC), Zemabawk ah Dr. Lalsiampara, Director, TCCC leh a thawhpui ten an lo dawngsawng thung a ni.

Subject Committee –III hian Aizawl Civil Hospital chhungah Central Sterile and Supply Department, Computerised Hospital Management Information System, CT Scan Machine (16 slices), Cardiology Department tihchangtlun mek, State Medical Library leh Dental Department tihchangtlun mek te an endik a. Tertiary Cancer Care Centre (TCCC), Zemabawk tlawh lehin an hmanraw neih chi hrang hrang te an endik bawk a ni. Vawiina an thilhmuhchhuah leh Health Department hotute chhanna te an thutkhawm leh huna sawihona nei in rawtna an siam dawn a. He an rawtna siamchhuahte hi sawrkarah an thehlut leh dawn a ni.