Aizawl DC hmalakna hnuaiah State Bank of India leh North Eastern Rural Livelihood Project (NERLP) tangkawpin, Aizawl khaw pawn lam ATM awm hnaivai lohna khua ten lam hla taka Bank leh ATM te pan ngai lova awlsam zawka pawisa an lakchhuah theih nan khaw hrang hranga SBI Micro ATM kenga kal kual tur, vawiin October ni 3, 2016 khan an ruat.

NERLP Aizawl District Project Management Unit hnuaia Self Help Group Bank Facilitator 15 te chu an thawhna khua-a an kal kualna theuhah heng SBI Micro-ATM te hi SBI aiawhin an keng thin dawn a. Bank facilitator pakhatin khaw panga-paruk bialin khaw 75 velin he Micro-ATM hi an chhawr thei ang.

Heng micro-ATM ah hian eng Bank debit card pawh a hman theih ang a. SBI card bik ah chuan vawi khat lakchhuahah a tlem berah Rs 7.50/-emaw pawisa lakchhuah zat atanga chhuta za a cheng khat (1%) zel charge a awm ve ang. Heng micro-ATM keng kualtute hian hlawh hran nei lovin transaction (pawisa lakchhuah) tinah Rs 5/- an hlawh ve thin dawn a ni.

He hmalakna hi sawrkar scheme hrang hrang hamthatna dawngtuten midang rin ngai lovin mahni bank account theuh atanga pawisa awlsam taka an lakchhuah theihna a nih dawn bakah, PMJDY Rupay Card neituten an card te kawl thi mai lovin, an card tihnun theihna remchangah an hmang thei bawk ang.