Vawiin chawhnu khan National Urban Livelihood Mission (NULM) hnuaia City Level Executive Committee for Lunglei Town chu a vawikhatna atan Lunglei Addl. DC office chamber-ah an thukhawm a. Meeting hi Addl. DC Pu J.H. Lalrimawia, MCS in kaihruaiin, Lunglei khaw chhunga NULM hmalakna te thlir ho a ni.

NULM hi peng 6-a then niin, chung peng hrang hranga hmalakna te chu DUDO leh Committee Secretary ni bawk Pu Andrew Lalhruaia’n a tarlang a. Self Help Group (SHG) 93-te hnenah Revolving Fund cheng 10,000 theuh pek niin, Urban Street Vendor awm zat hre tura survey lak mek a nih thu a sawi a. NULM kaltlanga mi 13-te hnenah loan pek a nih thu leh mi 420-te hnena capacity building training pek a nih thu a sawi a ni.

Committee chuan UD&PA Directorate in ‘Urban Homeless Shelters, Manual and Guideliness behchhana a duan Standard Operating Procedure (SOP), Mizoram State Urban Livelihood Mission (MzSULM)-in a hman tur  chu a pawmpui a. NULM peng pakhat, Capacity Building & Training (CB&T) hnuaia Shelter Management Committee din tur pawh din a remti a ni. Shelter for Urban Homeless chu Ramthar Vengah sa tura ruahmanna siam tawh ni mahse, Women Anti-Drug Association (WADA) leh UD&PA te inbiakremna angin, Lunglei Chanmari II-a WADA ramah sak zawk a remti bawk a ni.