Vawiin khan Agriculture Complex Lunglei a ATMA Office Building cheng nuai 20 seng a sak chu Agriculture (Crop Husbandry) Director Dr.C.Lalzarliana'n a hawng.

Hawnna inkhawm hi DAO, Lunglei Pu.J.Rothanga'n kaihruai in Khuallian Dr.C.Lalzarliana chuan kalkhawmte hnenah lawmthu sawiin sum harsatna chi hrang hrang kar ah ATMA Office sak ani hi lawmawm a tih thu a sawi a, hemi tipuitling tura sulsutu Government Of India leh Mizoram Sawrkar chungah lawmthu a sawi. ATMA hi tunlai a Gov't Of India Scheme pawimawh tak Agriculture & Allied Department te khaikhawm a, training leh demonstration pe thintu an ni a, Mizoram ah Mission Director in a ho a ni. Dr.C.Lalzarliana chuan kan hnathawh ah hian tihtakzetna hi a pawimawh a Pathian in hriselna tha min pe a kan Ram leh Hnam hmasawnna atan hna i thawk ang u a ti. Mizoram ah buh chin hi hlawk lo mahse buh thar theihna hmun tlemte kan neih hi venghim in buh kan thar zel tur ania ti a. Kan thil tih engkim ah tihtakzet a hma kan lak chuan kan intodelh mai nilovin hlawhtlinna kan nei ngei ang a ti bawk.

He ATMA Office Building hawn hi Mizoram pum a kuthnathawktu, Lo neitu te tan malsawmna In a nih a beisei thu a sawi.

He Building hi kum 2014 khan RKVY hnuaiah ATMA office sakna tur cheng nuai 20 hmuh atanga sak a ni a, ground floor ah hian Soil Testing Laboratory dah a ni a, 1st Floor hi ATMA Office tura sak a ni.

He Office hawnna ah hian Lunglei a Agriculture & Allied Department hrang hrang - Horticulture, Veterinary, Sericulture, Fishery leh Soil & Water Conservation Department ten an hmanpui a AMFU leh LDCC atangin an hmanpui bawk.