Vawiin hian Serchhip DC Conference Hall ah Serchhip khawpui leh a chhehvel khaw hnai vaia zirtirtu zawng zawngten Teachers' Day an hmang a, Addl DC Pu VL Remliana chu khuallian niin, mithiam hnen atangin Subject thlan bikah inzir hona an buatsaih nghal.

Teachers' Day hmanna inkhawm, Pu Lawmawma, DEO Serchhip kaihhruaiah hian Pu VL Remliana chuan, zirtirtute chu mi pawimawh leh dinhmun zahawm taka ding an ni a, hman lai atang tawhin khaw khat pa-rawn niin kan hre thin. Chutianga kan ngaih chhan chu keini aia thil hre zawk, kawng tinrenga a dik zawnga thurawn min pe thei tu nia kan rin vang a ni, a ti. Sawrkar leh sawrkar hnathawk dangte hian in pawimawh zia a hria a, fel kan ti che u, mahse in thawhna School naupang leh naupang nu leh pa te, in thawhna khawtlang ten fel an ti che u in, mi pawimawh ah an ngai che u em? tih erawh chu nangmahni inchhan a ngai thung ang. Kan hma lama he ram enkawltu, he rama cheng zel tur vawiina kan fate hnenah kawng dik in kawhhmuh thin em tih zawhna te chu in thinlungah cham reng se kan duh tak zet a ni, a ti.

Khuallianin fuihna thuchah a sawi bakah hian Message chhiarchhuahna hun te hman a ni a, zirlai naupang ten zaiin zirtirtu kalkhawmte an awi bawk.

Tin, Pu R. Lalawmpuia, Dy. DPC, SSA chuan zirtirtu kal khawmte chu Conduct Rules pawimawh zual hrilhfiahna hun a hmang a, Pu Thuamliana, SDEO, Serchhip chuan Right to Education chungchang zirtirna hun hmangin, Pu Lawmawma, DEO Serchhip leh he inkhawm kaihruaitu ni bawk chuan Leave Rules chungchang zirtirna a nei a. Heng subject hrang hrang te hi sawi hona hun an hmang chhunzawm bawk a ni.

Vawiina Teachers' Day District Level a hmanna ah hian zirtirtute an kal tha hle a, he programme bakah hian Serchhip khawpui chhunga School hrang hrangten anmahni remchan danin, a thenin zing lamah, a thenin chawhnu lamah te Teachers' Day hi an hmang hlawm bawk.

Attachment

  • Loading attachment...