Vawiin khan Seling YMA Runah Seling khawtlang hruaitute kaihhruaiin Zirtirtute Ni vawi 55-na hman a ni a, Home Minister Pu R.Lalzirliana chu khuallian a ni.
Pu R.Lalzirliana chuan ram hruaitu ropui, sawrkar hna lian leh te zawng zawng chelhtute chherchhuaktu chu zirtirtute an ni a, ram leh hnam siamtute dinchhuaktu an nih avangin an pawimawh takzet a ni, a ti. Zirlaiten zirtirtute mizia leh nihna an zir reng a, an nungchang leh awmdan hian kan ram nih zel dan tur a hril avangin tawngkam leh nungchangah zirtirtute an fimkhur hle a ngai a, pawlawh taka nun hman a rem lo, a ti. Home Minister chuan zirlaite thiam tir tura hmanraw tangkai ber chu taimakna a ni a, zirtirtu taima chuan ram leh hnam an tundin theih laiin zirtirtu thatchhia erawh chuan ram an hruai chhe vek thei a ni, a ti a. Continuous & Comprehensive Evaluation (CCE) hman mek hi zirtirtuten taima taka a nih dan tur dika taka an kalpui chuan zirlai thiam tak an chherchhuak thei a, zirtirtuiten zelthel taka bihruk nan an hman erawh chuan zirlaite rualbanlovah an chan thei a ni, a ti. Minister Pu R.Lalzirliana chuan Seling khawtlang dinchhuahna leh hmasawnna tur leh, he khawtlangin ram hruaitu tha a chherchhuah theih nan zirtirtute, zirlaite, nu leh pa leh khawtlang mipui inlungrualna leh thawhhona tha a pawimawh tih hre thar turin Teacher's Day hmangtute a chah bawk a ni.
Vawiin programme-ah hian Seling Govt.Middle School Headmaster Pu Lalchhanhima Chhangte, kumin Independence Day lawmnaa State Teachers Award 2016 dawngtu chawimawina hun hman nghal a ni.
Teachers' Day programme hi Seling VCP Pu R.Lalnunthara'n a kaihruai a. Education Minister Pu H Rohluna thuchah chhiarchhuah a nih bakah zirtirtute chawimawi nan zirlai naupang ten zirtirtu thawk mek leh pension tawh kal khawmte hnenah pangpar an hlan a ni.
Vawiin vek khan Home Minister Pu R.Lalzirliana chuan a bial chhung Thingsul-Tlangnuamah Solar LED Home Light a sem a. Tawi Constituency bialtu MLA hian model village atana a thlan Thingsul-Tlangnuamah hian chhungkaw sawmhnih hnenah solar light hi a sem a ni.
