1180/2026-2027

Dated Aizawl, the 25th June, 2026 : Vawiin khan Department of Commerce, Industries, Geology & Mining Department buatsaihin Planning & Programme Implementation Department Conference Hall-ah ‘Atmanirbharata in Defence Manufacturing - Promoting States Ecosystem’ (Ralthuam siam chhuaha India ram intodelh thei tura state tinte hmachhawp) Workshop (zirhona) neih a ni.

Commerce & Industries Additional Director Pu Lalhmunsiama chuan zirhona hi kaihruaiin Mizoramah a vawikhatna atan hetiang zirhona buatsaih theih a ni chu lawmawm a tih thu a sawi a, Mizoram chu state dangte nena khaikhin chuan ralthuam siam chhuah mang a la awm lova, mahse tlem tal pawh a thawh theih chuan India ramin mahni intodelh a tumna kawngah a hlawhtlin puih ngei a rin thu a sawi bawk. August thla a national level summit neih tur atan vawiina zirhona hi buatsaih a ni tih sawiin, he huna kal khawmte chu sawihona tha tak nei turin duhsakna a hlan a ni.

Department of Defence Production, Ministry of Defence, Government of India a Joint Director Pu Ajit Dubey pawh he zirhonaah hian telin, hmarchhak state-te leh ramri hrula awm state-te tana he zirhona pawimawhna leh hmabak te a sawi a, Department of Defence Production hmalakna pawh a sawifiah bawk.

Pu Ronald Lalchhuanawma, Commerce & Industries Deputy Director chuan BHAVYA Scheme sawifiahna a hmang a, Bharat Audyogik Vikas Yojna Scheme (BHAVYA) in a tum ber chu industry park 100 siam a ni a, industry din dawna harsatna awm thin - ram lei, eng awm tha lo, leh thil tih man sang te ti ziaawm tur atana duan a ni, a ti.

He zirhonaah hian NIT Mizoram, MZU, Ex-servicemen, Industry pawl, LESDE,  MISTIC leh MSME lama hotute an tel a ni.