1179/2026-2027

Dated Aizawl, the 25th June 2026: Vawiin khan Mizoram Urban Cooperative (MUCO) Bank Ltd. inkhawmpuilian vawi 32-na chu RB McCabe Hall, Aijal Club, Khatlaah neih a ni a. He hun hi Cooperation Department changtu Minister Pu P.C Vanlalruata chuan khuallian niin a hmanpui.

Pu P.C Vanlalruata chuan MUCO Bank chu an kal zelna turah duhsakna hlanin loan cheng nuai 3948.77 lai an pe chhuak thei chu hma an sawnzia tilangtu a ni, a ti a. Kumin February thlaa Bawngkawn Branch thar an hawng thei te chu a lawmpui thu sawi bawkin MUCO bank than zelna turin duhsakna a hlan bawk a ni.

Minister chuan sawrkarin kuthnathawktute ngai pawimawh zawnga tan a lak zel thu sawiin tun kumah pawh sawhthing leina atan sawrkarin cheng nuai tam tak thingtlang lama a pek chhuah thu a sawi a, chung kuthnathawktute chuan an sum dahthatna tur atan bank an mamawh zel bawk a ni, a ti a. Chung atan chuan MUCO Bank Ltd. chuan chanvo pawimawh tak an chelh a, hun lo la kal zel turah pawh Mizoramin hma a sawn zelna atan mawhphurhna an neih thu a sawi. Minister chuan sawrkarin Oil Palm Link Road (Kolasib, Mamit, Lunglei and Lawngtlai District kal tlang) thuam chakna atan PWD kaltlangin cheng vaibelchhe 25.97 lai tender an chhuah tawh thu sawiin sawrkar laipui scheme National Mission on Edible Oils – Oil Palm (NMEO-OP) zulzuia oil palm chingtute tan tan an lakpui zel a. India ram state dangte lakah Mizoram chuan Tung tam tham zawk leh hlawk zawk tharchhuahna tur hmunhma remchang bik a nei a. Hei hi hmang tangkaiin Mizoram sawrkar chuan National Mission on Edible Oil - Oil Seeds/Tree Borne Oilseeds Scheme hnuaiah Tung chin hi a ngaih pawimawh thu Pu P.C Vanlalruata chuan a sawi bawk.

MUCO Bank Ltd. hi August ni 11, 1988-a din niin, tun dinhmunah hian deposit cheng nuai 8150.75 awm tawhin, loan cheng nuai 3948.77 pek chhuah a ni tawh a, loan chhia NPA loan hi cheng nuai 218.95 an nei mek a. Shareholder mi 5664 awmin share cheng nuai 543.56 an nei mek a ni.

Vawiin assembly-ah hian MUCO Bank Ltd. Chairman Pu R. Liantluanga chuan inkhawm hi a kaihruai a, MUCO Bank Ltd. Secretary Pu H. Ramherliana chuan member 15 thite sunna hun a hmang a. CEO Pu Vanlalhuma hnen atang Annual Report ngaihthlak niin Board of Director Pu Lalhuma chuan lawmthu sawinain he inkhawm hi a khar a ni.