Vawiin khan Chief Secretary Pi. L. Tochhong, State Election Commissioner ni bawk hovin State Election Commission Office-a Autonomous District Council pathum hnuaia MDC bial pali ruak a By-Election neih dan tur chungchang an sawiho a, By-Election tana inpuahchah lawkna hrang hrang an thlir ho a ni.

Meeting-ah hian Pu H. Darzika, Secretary, State Election Commission leh SEC hotu dangte; Pu Singthanga, Secretary, District Council Affairs; Pu F. Vanlalruata, Finance Secretary; Saiha leh Lawngtlai DC leh LADC, MADC leh CADC aiawhte an tel a ni. Meeting-ah hian MDC bial 4-a By-Election neih hun tur chu MP Election 2014 leh LADC hnuaia VC Election neih hun turte thlir leh ngaituah chungin By-Election chu MP Election neih zawh hnuah neih nise tiin an rel. Meeting-ah hian by-election atana EVM mamawh chungchangte; inthlanna senso chungchangte; inthlanna bik chungchangah LADC dan hmanlai siamthat chungchang te an sawiho a, Model Code of Conduct bu leh Presiding Officer te tana inkhaihhruiana bu SEC-in a siam chu an thlirho bawk a ni.

By-Election neihna tur MDC bial te chu MADC hnuaia Tuipang II MDC bial; LADC hnuaia Lawngtlai Bazar leh Tuithumhnar MDC bialte leh CADC hnuaia Borapansury II bial te an ni.