Nimin khan UD&PA Minister Pu Zodintluanga chuan chawhnu dar 1:00 khan Lunglei-a Sorkar Department hrang hrang hotute leh tlawmngai pawl hrang hrang hruaitute chu Lunglei Circuit House Conference Hall-ah kokhawmin sorkar hmalakna leh hmachhawp turte a sawipui a ni.

Nimina meeting Lunglei DC Pu V.Sapchhunga, IAS kaihhruaiah UD&PA Minister Pu Zodintluanga chuan kum 5 kalta chhunga sorkar hmalakna hrang hrang kalpui chungchangah sorkar hnathawkte leh tlawmngai pawl te thawhhona tha leh inthlawpna tha tak an neih thin avangin Lunglei chuan hmasawnna tam tak a hmu zel a ni, a ti. Lunglei chuan High Powered Committee a neih chu vanneihthlak a ni tiin Pu Zodintluanga chuan sorkar hmalakna bakah HPC kaltlanga ruahmanna a siam zawng zawngah te sorkar hnathawk, tlawmngai pawl, khawtlang hruaitute leh mipuite chu tangruala thawhho an thiam a pawimawh tak zet a ni, a ti. Sorkar hmalakna hrang hrang - Conventon Centre, infiamna hmun tur Stadium changtlung zawk te, Community Hall nei ang ang cheithat te, kawngpui siamthat hna te leh a dangte - chu tlawmngai pawlte zarah boruak muanawm tak hnuaiah chak takin thawh mek zel a ni tiin Minister chuan lawmthu a sawi a ni.

He meeting-ah hian sorkar department hotute leh tlawmngai pawl hruaitute chuan harsatna an tawh hrang hrang leh Lunglei tana hmalak tula an hriatte an sawiho zingah Lunglei Civil Hospital hnathawk indaihloh thu te, zirlaite tan College seat indaihloh thin avanga College din belh emaw tihlen dan tur te, Lunglei Bazarpui Step siamthat te, Kawlphetha lama harsatna tawh thin te leh Lunglei Municipal Council din chungchangte a tel a ni.