Bukvanneia Oil Palm Mill siam hna thawk mektu Godrej Agrovet Company hotute chuan an hna thawh mek chu nitin tha thlah lova thawkin hun reiloteah an zawh theih dawn thu vawiina anmahni tlawhtu Pu K. Lalrinthanga, Parliamentary secretary an hrilh.

Pu K. Lalrinthanga, Parliamentary Secretary i/c Horticulture, LAD, etc,. chuan Godrej hotute chu an khawl bum mekte a nih dan leh an thawh dan phungte vawiin khan a enkual a. Oil Palm Mill bun meka Asst. Director Er. YSSV Suresh leh a hoten lo dawngsawngin nitina an thawh dan phungte an hrilhfiah a. Fur ruahtui tlain an hnathawh a tih khaihlak nasat thu leh hei hian hmanraw chawkluh bakah khawl bun kawngah te thui tak a ti khaihlak tih an hrilh a. Pu Rinthanga chuan Oil Palm Mill chu a rang thei ang bera hna tichak a, hawn theia puahchah turin a ti a. Ruahman anga March thla tira hawn theih ngei a nih dawn leh dawn loh a zawhna chu Pu Suresh-a hian za-ah za a chian theihloh thuin a chhang a ni. Pu K. Rinthanga chuan Company te hna thawh dan chu a tul anga lo vil turin Kolasib DAO a chah nghal a, an hnathawh dan thlenchin apiang Pu C. Lalzarliana, Director, Agriculture hnenah report pe thin turin a ti bawk a ni.

Pu K. Lalrinthanga hi Pu C. Lalzarliana, Agriculture Director-in a tawiawm a, a nupui Pi Thangchhungi pawhin a tawiawm bawk a ni.

Oil Palm Mill hi a nih anga khawl tlantir turin Company chuan Generator pahnih 200 KVA ve ve a bun mek a, hei bakah hian Transformer 500 KV a bun tawh bawk a ni. Nitin Oil Palm darkar riat chhung her thei tura ngaih a ni a. Amaherawhchu tun dinhmuna Oil Palm thar chhuah dan en hi chuan ni khatah darker 4 daih her thei tur ang vel an ni tih Gogrej hotute hian an sawi a. Oil Palm chingtu a rah thar tan mekte an awm zel bawk avangin hriak her tur hi a pun chhoh zel erawh chu an beisei a ni.

Oil Palm chingtute hnen atanga a rah lak khawl dan tur pawh Company hian a duang mek a. Kolasib District-ah lak khawlna hmun collection centre 26 leh Mamit District chhungah collection centre 33 an siam a, heng centre atangte hian Company chuan Mill ah hian an thiar thin dawn a ni. Oil Palm her chhuah sa Crude Oil chu Tanky lian takah lut khawmin a thlitfimna hmun (refinery) Mizoram pawnahah thawn thin a ni dawn a ni.