Vawiin hian I&PR Conference Hall, Serchhipah Fishries Department chuan ‘Enhancement of Fish & Fish Seed Production and Sustainable Aqua Culture Production in the State’ tih hmangin Training an buahsaih.

He huna khuallian Pi Sangchhin Chinzah, Serchhip District Bawrhsap chuan thu sawiin, Serchhip chu khaw nuam leh taima, thalaite leh College zirlaite pawh an hun awlah chuan hnathawk thin an nih avangin lawmawm a tih thu a sawi a. Kuthnathawhah hlawhtling tur chuan teirei peih a pawimawh a ni a ti a. Sangha hi sa hrisel ber, pawisawilo leh duat manhla tak anih thu sawiin, sangha khawitute chu atirah hlawhtling nghal lo mahse tih tak zet leh taima taka an thawh chuan an la hlawhtlin ngei a beisei thu a sawi a. Serchhipah a beiseia lian sangha dil, tha tak leh sangha lian hmuh tur a awm chu lawmawm a tih thu a sawi bawk. Prime Minister Doubling Farmers Income 2022 ti hlawhtling tu nih tum a, mahni ngaihdan ngawt nilo a, mithiamte zirtir anga hma la thei turin training pawh uluk taka nei a, hmasawn pui ngei turin kalkhawmte a chah.

Thusawitu dang Pi Zonuntluangi, DFDO Serchhip chuan hun leh tha senga training ngai pawimawhtu farmerte hnenah lawmthu a sawi a. Awmze nei leh hlawk zawka sangha thar chhuah theih nana chhawr tangkaitu ni ngei tura fuihin, district chhunga Fisheries Department hmalakna te chu a lem nen entirin a tarlang bawk a ni.

Training hi hun hniha then niin hlawk zawka sangha an thar chhuah theihna tura sangha dil enkawl dan leh Doubling Farmers income 2022 denchhena Farmers ten sangha dil hlawk zawk leh awmze nei zawka an huan an enkawl theih dan tur- Integrated Fish farming chu Fisheries mithiam ten a lem nena entirin an zirtir a, farmers te nen sawi hona hun hlawk tak an hmang bawk a ni.