No.4168/2021-2022
Aizawl the 3rd March, 2022: AYUSH Hospital 6 (50 bedded pathum leh 10 bedded pathum) sakna tur lungphumna leh AYUSH Health & Wellness Centre unit 24 hawnna vawiin khan Dawrpui Multipurpose Hall-ah buatsaih a ni a. Chief Minister Pu Zoramthanga chu khuallian niin, sawrkar laipuia Ministry of AYUSH leh Ministry of Ports, Shipping and Waterways changtu Union Cabinet Minister Pu Sarbananda Sonowal chu khualzahawm a ni.

Chief Minister chuan AYUSH Ministry kaltlanga Mizoramah healthcare lama hmasawnna ruhrel din belh a ni tur chu lawmawm a ti a. Ayush inenkawlna chu India sawrkarin a ngaihpawimawh thu sawiin, a enkawl turin India hmarchhak mi ngei sawrkar laipuiin a dah chu lawmawm a ti a. Ayush inenkawlna atana damdawi hman thin - ramhmul damdawi hrang hrang chinna tur hmun zau leh tha tak Mizoramin a neih thu te a sawi bawk in, hemi kawngah hian India hmarchhak chu potential nei tha tak a nih thu te a sawi.

Union Minister Pu Sarbananda Sonowal chuan hmarchhak state te chu India ram tana tangkai, potential a neih hrang hrangte chu haichhuah a man tangkai chuan India ram chakna chhan ni thei a ni, tiin sawrkar laipui pawhin hmarchhak state-te tihhmasawn chu a ngaihpawimawh thu a sawi a. India ram a intodelh tura hmalakna "Atmanirbhar Bharat" kalpui mekah Mizoram pawh intodelh turin theihna potential tha tak tak a neih avangin vannei a ti a. Vawiina lungphum phum tak project-te pawh a hun taka zawh ngei a beisei thu a sawi a ni.

Hun kaihruaitu Health & Family Welfare Minister Dr. R. Lalthangliana chuan AYUSH inenkawlna tihchangtlun zel a ni chu lawmawm a ti a. Vawiina Health & Wellness Centre hawn tak unit 24 bakah hian sawrkar kum tharah unit 12 hawn belh tum a nih thu a sawi a. Ramhmul damdawi chinna tur ram hectare 11,310 a zau a awm thu leh nursery pariat leh model nursery 2 a awm thu te a sawi bawk.

Vawiin inkhawm hi Dr. ZR Thiamsanga, Health & Family Welfare Board Vice-hairman chuan lawmthu sawiin a titawp a. Lok Sabha MP Pu C. Lalrosanga pawh he hunah hian a tel a ni.

50 bedded AYUSH Hospital pathum te hi Aizawl, Champhai leh Hnahthial a sak tur niin, 10 bedded AYUSH Hospital pathum hi Khawzawl, Saitual leh Hortoki a din tur a ni a. Vawiina Health & Wellness Centre unit 24 hawnna te chu Ramhlun South, S Maubuang, Sakawrdai, Armed Veng North, Khatla, Venghnuai, Baktawng, Sesawng, Sakawrtuichhun, Keifang, Bungkawn, Ngopa, Khuangthing, Lawngtlai, Parva, Chawngte, Pukpui, Tuichawng, New Serchhip, Keitum, Chapui, Niawhtlang, N Thingdawl leh Darzo Sub-Centre-ah te a ni.